Dopty hokkeı: «Aqjaıyq» qatarynan tórtinshi ret jeńiske jetti

ORAL. QazAqparat – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» «Jastar» stadıonynda «Kırovets» (Ýfa) komandasymen ekinshi oıynyn ótkizdi, dep habarlaıdy QazAqparat tilshisi.

Birinshi taım basynda-aq «Aqjaıyqtyń» surmergeni, reseılik shabýylshy Maksım Pahomov osy maýsymdaǵy óziniń 21-inshi golyn soqty. Sondaı-aq «Aqjaıyq» sapynan taǵy bir reseılik Sergeı Bashaev pen komanda kapıtany Maksım Ótebalıev mergendigimen kózge tústi. Qonaqtar da qarap qalmaı, «Aqjaıyq» qaqpasyna eki gol saldy.

Ekinshi kezeńde S.Bashaevtyń pasynan keıin M.Pahomov 55-mınýtta esepti 4:2-ge jetkizdi. Degenmen bes mınýttan keıin «Kırovetsten» Dmıtrıı Vahrýshev, sosyn Roman Frolov tarazy basyn teńestirip úlgerdi. Kóp uzamaı M.Pahomov 12 metrlik aıyp dobyn dál oryndap, komandasyn qaıta alǵa shyǵardy – 5:4. 70-mınýtta M.Ótebalıevtiń pasynan keıin taǵy bir reseılik Aleksandr Slýgın óz esebine bir gol jazdy – 6:4. Budan soń «Kırovets» esepti qysqartqanymen, odan árige shamasy jetpedi.

Jalpy esep – 6:5.

Osylaısha qatarynan tórtinshi ret jeńiske jetip, 21 upaı jınaǵan oraldyq klýb úshinshi topta burynǵysynsha ekinshi orynda keledi.

Nıkolaı Shavaldınniń shákirtteri kelesi kezdesýlerin jańa jylda, 10-11 qańtarda «Lokomotıv» komandasymen ótkizedi.

Eske sala keteıik, budan buryn «Aqjaıyqtyń» «Znamıa-Ýdmýrtııa» komandasyn ekinshi ret jeńgenin, «Kırovetsti» utqanyn jazǵan bolatynbyz.

Foto: Aıbatyr Nurash