Dopty hokkeı: «Aqjaıyq» qarsylasyn oısyrata utty

ORAL. QazAqparat – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» óz aıdynynda Sverdlov oblysynyń «SKA-Sverdlovsk» komandasyn qabyldady, dep habarlaıdy QazAqparat tilshisi.

«Jastar» stadıonynda ótken matchta oraldyqtar 9:1 esebimen qarsylasyn bet qaratpaı utty.

Bul oıynda komandanyń surmergeni, reseılik Maksım Pahomov jeti goldyń avtory atandy. Sondaı-aq Oral dopty hokkeıiniń túlekteri Pavel Chebakov pen Dáýren Oralovtyń qanjyǵalary maılandy. Qonaqtardan Vladıslav Fedorenko ǵana bir gol soǵa aldy.

Erteń komandalar ekinshi kezdesýin ótkizedi.

Nıkolaı Shavaldınniń shákirtteri 11 oıynnan keıin 24 upaı jınady. Úshinshi topta «Aqjaıyqtyń» aldyńǵy oryndarǵa kóterilýine múmkindik bar. Óıtkeni bıyl eldegi tótenshe jaǵdaıǵa baılanysty Orynbordyń «Lokomotıvimen» ótpeı qalǵan eki match syrt aıdynda 26-27 aqpanda bolmaqshy. Sonymen qatar 2-3 aqpan kúnderi oraldyqtar Verhnıı Ýfaleıdiń «Nıkelşık» komandasyn qabyldaýy kerek edi. Alaıda «Nıkelşık» Oralǵa kelmeı qaldy. Buǵan baılanysty Reseı dopty hokkeı federatsııasy tıisti sheshim qabyldaıdy.

Eske sala keteıik, budan buryn «Aqjaıyqtyń» qatarynan tórtinshi ret jeńiske jetkenin jazǵan bolatynbyz.