Dopty hokkeı: «Aqjaıyq» qarsylasyn iri eseppen utty
ORAL. QazAqparat – Dopty hokkeıden joǵary lıga komandalary arasynda Reseı chempıonatynda Oraldyń «Aqjaıyǵy» Orynbordyń «Lokomotıvimen» ekinshi kezdesýin ótkizdi, dep habarlaıdy QazAqparat tilshisi.
«Jastar» stadıonynda ótken matchta oraldyq maman Nıkolaı Shavaldınniń shákirtteri qarsylasyn 13:4 esebimen oısyrata utty.
Bul oıynda «Aqjaıyqtyń» surmergeni, reseılik Mıhaıl Pahomov alty goldyń avtory atandy. Ol bıylǵy maýsymda soqqan gol sanyn 20-ǵa jetkizdi.
Sondaı-aq, reseılikter Artem Lapshın men Aleksandr Slýgın úsh-úshten gol soqty. Nurbol Bókeshov te aıdynnan bos ketpeı, taǵy bir goldy enshisine jazdy.
Osylaısha, 6 oıynnan keıin 15 upaı jınaǵan oraldyq komanda óz tobynda ázirge tórtinshi orynda keledi. Biraq, qarsylastaryna qaraǵanda, «Aqjaıyq» matchty áldeqaıda kem ótkizdi.
Batysqazaqstandyq klýbtyń kelesi kezdesýleri 28-29 qańtarda óz aıdynynda «Nıkelşıkpen» (Verhnıı Ýfaleı) ótedi.
Eske sala keteıik, budan buryn «Aqjaıyqtyń» orynborlyq komandany utqanyn jazǵan bolatynbyz.
Foto: «Aqjaıyq» SK
