Dopty hokkeı: «Aqjaıyq» eki oıynda da «Dınamo-Qazan-2» komandasyn 9:3 esebimen oısyrata utty
ORAL. QazAqparat - Dopty hokkeıden Reseı chempıonaty joǵary lıgasynyń ekinshi tobynda oınaıtyn Oraldyń «Aqjaıyǵy» óz aıdynyndaǵy alǵashqy kezdesýlerinde jeńiske jetti, dep habarlaıdy QazAqparat tilshisi.
Oraldaǵy «Jastar» stadıonynda jasandy muz aıdyny salynýyna baılanysty «Aqjaıyq» bıylǵy maýsymdaǵy matchtaryn Zachagan kentindegi «Stenovık» stadıonynda ótkizýde. 24 jáne 25 qańtar kúni «Dınamo-Qazan-2» (Qazan) komandasymen bolǵan eki oıyn da 9:3 esebimen aıaqtaldy. Birinshisinde komanda kapıtany Maksım Ótebalıev het-trıktiń avtory atansa, reseılikter Sergeı Bashaev pen Evgenıı Sýkovın eki-ekiden, Artem Nedostýpov pen Sergeı Panteev bir-birden gol engizdi. Ekinshi kezdesýde qarsylastar qaqpasyna S.Bashaev 4, M.Ótebalıev 3 dop salsa, E.Sýkovın men taǵy bir reseılik Sergeı Gavrılov bir retten kózge tústi. Sóıtip S.Bashaev osy maýsymda soqqan gol sanyn 29-ǵa, M.Ótebalıev 14-ke jetkizdi.
Bul týrdan keıin reseılik maman Vladımır Kojevnıkov jattyqtyratyn oraldyqtar 16 upaımen ekinshi topta úshinshi orynǵa kóterildi. Endi olar kelesi kezdesýlerin 14-15 qańtarda óz aıdynynda Orynbordyń «Lokomotıvimen» ótkizedi.
