Dopty hokkeıden «Aqjaıyq» jyldyń sońǵy oıynyn jeńispen túıindedi

ORAL. KAZINFORM — Dopty hokkeıden joǵary lıga komandalary arasynda búkilreseılik jarysta «Aqjaıyq» Oraldaǵy «Jastar» stadıonynda «Akademııa «Ýralskıı trýbnık» (Pervoýralsk) klýbymen ekinshi oıynyn ótkizdi.

Keshegi kezdesýde aıdyn ıeleri 5:3 esebimen utqan edi.

Bul joly da báseke asa tartysty bolyp, «Aqjaıyqtyń» paıdasyna aıaqtaldy – 5:4.

Oraldyqtardan komanda surmergeni Maksım Pahomov óz esebine úsh gol jazsa, taǵy bir reseılik Artem Lapshın eki ret mergendik tanytty. Sondaı-aq Raýan Isalıev eki márte nátıjeli pas berdi.

«Akademııa «Ýralskıı trýbnık» klýbynan komanda kapıtany Andreı Zelenın 2 goldyń avtory atansa, Konstantın Elovıkov pen Arsenıı Loskýtov bir-birden kózge tústi.

Osylaısha, Nıkolaı Shavaldınniń shákirtteri jyldyń sońǵy oıynyn jeńispen túıindep, upaı sanyn 21-ge jetkizdi. 

«Aqjaıyq» ekinshi topta týrnır kestesinde «Maıak» (Krasnotýrınsk) pen «Akademııa «Ýralskıı trýbnık» komandalarynan keıin úshinshi orynda keledi. Biraq qarsylastaryna qaraǵanda, batysqazaqstandyqtardyń ótkizgen oıyn sany kem. Demek, olardy qýyp jetýge múmkindik bar.

Oraldyqtar jańa jylda 9-10 qańtarda Orynborda jergilikti «Lokomotıvpen» synǵa túsedi. 

Eske sala keteıik, budan buryn dopty hokkeıden «Aqjaıyqtyń» kezekti jeńisine qol jetkizgenin jazǵan bolatynbyz.