Dopty hokkeıden «Aqjaıyq» Reseı birinshiliginde júldege talasa ala ma - bapker
ORAL. KAZINFORM – Oraldyń «Aqjaıyǵy» dopty hokkeıden joǵary lıga komandalary arasynda Reseı birinshiliginde júldege talasa ala ma? Osy jóninde «Aqjaıyq» komandasynyń bas bapkeri, halyqaralyq dárejedegi sport sheberi Nıkolaı Shavaldın áńgimelep berdi.
- Nıkolaı Vıktorovıch, bıylǵy maýsymda «Aqjaıyq» komandasynyń qarqyny jaqsy. Óz tobynda kósh bastaýshylardyń qatarynda keledi. Munyń syry nede dep oılaısyz?
- Ótken maýsymmen salystyrǵanda, komanda quramy kúsheıtildi, oıynshylardyń bir-birimen túsinistigi arta tústi. Ásirese, Raýan Isalıevtiń Oralǵa oralýy aıryqsha serpin berdi. Komandanyń basqa da kóshbasshylarymen birge bıyl qarsylastarymyzdy kóbirek qorǵanysqa kóshýge májbúrledik. Mine, sonyń nátıjesinde gol da kóbeıdi. Mysaly, 20:3 sııaqty iri esepter tirkelip jatyr. Óz tobymyzda kósh bastap, basqalardan kúshimiz basym ekendigin sezine tústik.
- Reseı chempıonatynyń joǵary lıgasynda turaqty óner kórsetetin «Aqjaıyqtyń» júldege ilikpegenine kóp boldy. Bıyl sol seń buzyla ma?
- Bizdiń birinshi maqsatymyz da osy, joǵary lıganyń fınaldyq kezeńine joldama alyp, onda júldege qol jetkizý edi. Qazirdiń ózinde biz joldamaǵa ıe boldyq. Joǵary lıgada úsh top bolsa, sonyń árqaısysynan tórt úzdik komanda fınaldyq oıyndarda óner kórsetedi. Fınaldyq kezeńniń qashan jáne qaıda ótetini toptyq básekeler aıaqtalǵannan keıin belgili bolady.
- Dopty hokkeıden Qazaqstan ulttyq quramasynyń negizin «Aqjaıyq» oıynshylary quraıtyny belgili. Bıyl álem chempıonaty óte me? Quramaǵa basqa kimder alynady?
- Álem chempıonaty naýryz aıynyń aıaǵynda Shvetsııada ótedi. Osyǵan deıin Qazaqstan quramasy óz tarıhynda alty ret qola júldeger atansa, bul joly da bıik maqsat údesinen shyqsaq pa deımiz. Komandaǵa Norvegııa chempıonatynda «Rea» klýbynda óner kórsetetin Oral dopty hokkeıiniń túlegi Eskendir Nuǵmanov qosylady. Ulttyq quramany Sergeı Vladımırovıch In-fa-lınmen birge men jattyqtyramyn.
- Álem chempıonatyna belgili sebeptermen Reseı quramasy qatyspaıtyny belgili. Shvetsııa jáne Fınlıandııa – óte myqty komandalar. Al Norvegııa jóninde ne aıtar edińiz?
- Iá, negizgi qarsylastar qatarynda Norvegııa men AQSh-ty ataımyz. Bulardyń da deńgeıi ósti. Birqatar oıynshylary Shvetsııa klýbtarynyń namysyn qorǵap júr. Osydan-aq biraz nárseni ańǵarýǵa bolady.
- «Aqjaıyq» komandasy 1976 jyly qurylǵany belgili. Sodan beri klýb óziniń baı dástúrin joǵaltpaı, nyq senimmen alǵa basyp keledi. Aldaǵy ýaqytta osy qarqyndy jalǵastyratyn keıingi lek jóninde ne aıtar edińiz?
- Klýbymyzda Rýslan Taýhaev, Músilim Meńdihanov, Igor Horolskıı sekildi bolashaǵynan úmit kúttiretin jastarymyz bar. Jattyǵýǵa durys qarap, tynbaı jattyǵa bilse, sheber oıynshyǵa aınalatyndaı múmkindikteri bar. Bári ózderine baılanysty.
- Eskendir Nuǵmanovtyń «Aqjaıyqqa» oralýy múmkin be?
- Esendirdiń klýbqa qaıta oralýy jóninde biz aldyn ala sóılestik. Óziniń de nıeti sondaı. Kelip jatsa, biz de qýana qarsy alar edik.
- Siz ózińiz de burynǵy oıynshysyz. Sporttyq jolyńyzǵa toqtala ketseńiz.
- Oral qalasynda týyp-óskendikten, dopty hokkeıge bet buryp, men de 1992-2012 jyldary «Aqjaıyqtyń» namysyn qorǵadym. 2012-2015 jyldary aıdynda ári oıynshy, ári bapker boldym. Sosyn úsh jyl ekinshi bapker qyzmetin atqardym. Al 2018 jyldan beri bas jattyqtyrýshymyn. Qazaqstan men Qysqy Azıada chempıonymyn. Oıynshy jáne bapker esebinde álem birinshiligine qatystym. Halyqaralyq dárejedegi sport sheberimin.
- Osyndaı baı tájirıbeńiz bar eken. Shákirtterińizdi jeńiske jigerlendirý qıynǵa túspeıtin shyǵar?
- Komandadaǵy barlyq jigit – kásipqoı oıynshy, bári de tatý, únemi jeńis úshin bel býyp, aıdynǵa tisterin qaırap shyǵady. Sondyqtan olardy jigerlendirý ońaı. El úshin, týǵan qalamyz úshin, jankúıerler úshin, ózderi úshin janyn salyp oınaıdy. Ár matchqa taktıka quramyz da, alǵa deımiz.
- Sońǵy saýal, dopty hokkeıdiń Qazaqstandaǵy bolashaǵy qandaı dep bilesiz? Elimizde joǵary deńgeıde óz chempıonatymyzdy ótkizýge, sporttyń osy túrin keńinen damytýǵa ne kedergi?
- Dopty hokkeıden Qazaqstan birinshiligi uıymdastyrylyp keledi. Bıyl 28 qańtar – 1 aqpan aralyǵynda Oralda ótedi. Tek elimizdiń ózge óńirlerinde de dopty hokkeı bizdegideı jolǵa qoıylsa eken deımiz. Sonda chempıonatta básekelestik arta túser edi. Qurama da myqty bolyp, tabysqa qol jetkizer edi. Dopty hokkeı – óte jyldam, tartymdy da ádemi sport túri ǵoı. Sondyqtan onymen aınalysqan adamnyń armany asqaq, dene bitimi myqty bolady.
- Áńgimeńizge raqmet. «Aqjaıyq» pen Qazaqstan quramasynyń júldeli oryndardan kórinýine tilektespiz.
Eske sala keteıik, budan buryn «Aqjaıyq» dopty hokkeı klýbynyń bolashaǵy qalaı bolatynyn jazǵan edik.
Sondaı-aq «Aqjaıyq» óz tobynda kósh bastady.