Dopty hokkeıden «Aqjaıyq» kezekti jeńisine qol jetkizdi

ORAL. KAZINFORM — Dopty hokkeıden joǵary lıga komandalary arasynda búkilreseılik jarysta «Aqjaıyq» qatarynan úshinshi jeńisine qol jetkizdi.

Batysqazaqstandyq klýb bul joly «Jastar» stadıonynda ekinshi topta týrnır kestesinde 24 upaımen 2-orynda kele jatqan «Akademııa «Ýralskıı trýbnık» (Pervoýralsk) komandasyn qabyldady.

Tartysty ótken matchta Nıkolaı Shavaldınniń shákirtteri 5:3 esebimen jeńiske jetti.

«Aqjaıyqtyń» surmergeni, reseılik shabýylshy Maksım Pahomov het-trıktiń avtory atanyp, bıylǵy maýsymdaǵy 7 oıynnan keıin soqqan gol sanyn 20-ǵa jetkizdi.

Sondaı-aq taǵy bir reseılik Artem Lapshın men Samat Amanshın mergendik tanytty.

Qonaqtardan Alekseı Snegırev, Andreı Zelenın, Konstantın Elovıkov bir-birden dop soǵa aldy.

Erteń qos komanda ekinshi kezdesýin ótkizedi.

Eske sala keteıik, budan buryn dopty hokkeıden «Aqjaıyqtyń» reseılik klýbty ekinshi ret utqanyn jazǵan bolatynbyz.