Dopty hokkeıden «Aqjaıyq» alǵashqy kezdesýlerin syrt aıdynda ótkizedi

ORAL. KAZINFORM – Oraldyń «Aqjaıyǵy» dopty hokkeıden joǵary lıga komandalary arasynda búkilreseılik jarysta jańa maýsymdy bastaıdy.

Oraldyqtar ekinshi topta «Znamıa-Ýdmýrtııa» (Votkınsk), «Maıak» (Krasnotýrınsk), «Akademııa «Ýralskıı trýbnık» (Pervoýralsk), «Volga-Cheremshan» (Ýlıanovsk), «Nıkelşık» (Verhnıı Ýfaleı), «Ak Bars-Dınamo-2» (Qazan), «Lokomotıv» (Orynbor) komandalarymen synǵa túsedi.

«Aqjaıyq» sport klýbynyń dırektory Damır Qalaqovtyń málim etkenindeı, bıyl komandaǵa tanymal shabýylshy, Oral dopty hokkeıiniń túlegi Raýan Isalıevqa qosa Pavel Chebakov, Imran Qojahmetov, Ilıa Glýhov qosyldy. Reseılik legıonerlerden klýbtyń surmergeni Maksım Pahomov pen Artem Lapshın qaldy.

Komanda búgin syrt aıdyndaǵy matchtaryn ótkizý úshin attanady.

«Aqjaıyq» 12-13 jeltoqsanda Votkınskide «Znamıa-Ýdmýrtııa», sodan keıin 16-17 jeltoqsanda Krasnotýrınskide «Maıak» komandasymen oınaıdy.

«Daıyndyq josparǵa saı ótti. Eki aı boıy shaǵyndaý muz aıdynynda jattyqtyq. Úlken aıdynda da eki-úsh jattyǵý ótkizip úlgerdik. Bıyl komanda quramynyń kúsheıtilgenin eskere otyryp, bastapqy eki týrda upaıdy barynsha tolyq alýǵa tyrysamyz. Votkınskide kópten beri upaı alyp kórmep edik, sol qolaısyz dástúrdi buzýǵa kúsh salamyz. «Maıak» ta osal qarsylas emes. Eń bastysy, barlyq oıynshylardyń densaýlyǵy jaqsy, kóńil-kúıleri de kóterińki», dedi komandanyń bas bapkeri, oraldyq maman Nıkolaı Shavaldın.

Eske sala keteıik, budan buryn Oral dopty hokkeıiniń túlegi Raýan Isalıevtiń «Aqjaıyqqa» qaıtyp oralǵanyn jazǵan bolatynbyz.