Dopty hokkeı: Oraldyń «Aqjaıyǵy» maýsymdy iri jeńispen túıindedi

IRKÝTSK. KAZINFORM — Irkýtsk qalasynda dopty hokkeıden joǵary lıga komandalary arasynda búkilreseılik jarystyń fınaldyq týrnırinde Oraldyń «Aqjaıyǵy» jetinshi oryn úshin «Nıkelşık» (Verhnıı Ýfaleı) komandasymen synǵa tústi.

Qos klýb ta fınaldyq týrnırge deıin ekinshi topta oınaǵandyqtan, bir-birimen jaqsy tanys edi. 

Nıkolaı Shavaldınniń shákirtteri maýsymdaǵy sońǵy oıyndy óte qarqyndy ótkizip, «Nıkelşıkti» 9:3 esebimen tize búktirdi.

«Aqjaıyqtan» reseılik shabýylshy Maksım Pahomov 4 gol soǵyp, mergendik tanytty. Taǵy bir reseılik Artem Lapshınniń enshisinde 3, komanda kapıtany Maksım Ótebalıevtiń esebinde 2 dop bar. 

«Nıkelşıkten» Denıs Bretavskıı, Artem Samoılov, Anton Ponomarev bir-bir goldan soqty.
Osylaısha, 2023-2024 jylǵy maýsymda «Aqjaıyq» óz tobyndaǵy úzdik komandalardyń qatarynan tabylyp, fınaldyq týrnırde baq synady. Onda jetinshi orynǵa ıe boldy.

Eske sala keteıik, budan buryn «Aqjaıyqtyń» qorytyndy matchynda máskeýlik komandany jeńgenin jazǵan edik.