Dopty hokkeı: Fınaldyq týrnırde «Aqjaıyq» alǵashqy jeńisine qol jetkizdi

ORAL. KAZINFORM — Kemerovo qalasynda dopty hokkeıden Reseıdiń joǵary lıga komandalary arasynda ótip jatqan fınaldyq týrnırde Oraldyń «Aqjaıyǵy» A tobynda kezekti kezdesýin ótkizdi.

Nıkolaı Shavaldınniń shákirtteri bul joly «Stroıtel» (Syktyvkar) komandasymen sheberlik baıqasty.

Birinshi taımda «Aqjaıyqtan» Maksım Pahomov esep ashsa, «Stroıtelden» Nıkıta Sıtnıkov tarazy basyn teńestirdi. Sodan keıin Pavel Chebakov oraldyqtardy alǵa shyǵardy – 2:1.
Ekinshi taımda komanda kapıtany Maksım Ótebalıev eki, M.Pahomov bir gol soǵyp, esepti 5:1-ge jetkizdi. Buǵan Leonıd Afanasev jaýap qaıyrsa, oraldyq Denıs Maksımenko mergendik tanytty. Sosyn N.Sıtnıkov 12 metrlik aıyp dobyn dál oryndady. Qorytyndy esep – 6:3, «Aqjaıyqtyń» paıdasynda.

Osy oıynnan keıin 4 upaı jınaǵan oraldyqtar óz tobynda tórtinshi orynǵa kóterildi. 

Eske sala keteıik, budan buryn «Aqjaıyqtyń» tartysty matchta máskeýlik komandaǵa ese jibergenin jazǵan bolatynbyz.