Dopty hokkeı: «Aqjaıyq» tartysty matchta qarsylasyna jol berdi

ORAL. KAZINFORM – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» Pervoýralskide «SKA-Ýralskıı trýbnık-2» (Ekaterınbýrg) komandasymen ekinshi kezdesýin ótkizdi.

Keshe alǵashqy oıynda aıdyn ıeleri 5:3 esebimen basym túsken bolatyn.

Onda «Aqjaıyqtan» komanda surmergeni Maksım Pahomov qos goldyń avtory atansa, taǵy bir dopty Artem Lapshın óz esebine jazdy.

Búgin birinshi taımda «SKA-Ýralskıı trýbnık-2» komandasy qarqyndy oınap, 4:0 esebimen alǵa ketti. Budan keıin oraldyqtar tarazy basyn teńestirýge tyrysqanymen, sáttilik jetispedi. Qorytyndy esep – 6:5, reseılik klýbtyń paıdasynda. «Aqjaıyqtan» taǵy da M.Pahomov pen A.Lapshın eki-ekiden gol soqsa, Nurbol Bókeshov te aıdynnan qur ketken joq.

Osylaısha, oraldyq Nıkolaı Shavaldınniń shákirtteri syrt aıdyndaǵy sońǵy tórt kezdesýinde de jeńilip qaldy.

Týrnır kestesinde «Nıkelşık» (Verhnıı Ýfaleı) 56 upaımen kósh basyna shyqsa, «Aqjaıyq» (54 upaı) ázirge ekinshi satyda tur.

Batysqazaqstandyqtar bıylǵy maýsymdaǵy qorytyndy matchtaryn 27-28 aqpanda Verhnıı Ýfaleıde «Nıkelşıkpen» ótkizedi.

Eske sala keteıik, budan buryn «Aqjaıyqtyń» segiz jeńisten keıin qarsylasyna ese jibergenin jazǵan bolatynbyz.