Dopty hokkeı: «Aqjaıyq» orynborlyq komandany 17:0 esebimen oısyrata utty

ORAL. KAZINFORM – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» «Jastar» stadıonynda Orynbordyń «Lokomotıvimen» ekinshi kezdesýin ótkizdi.

Nıkolaı Shavaldın jattyqtyratyn oraldyqtar keshe birinshi matchta 20:3 esebimen jeńgen bolatyn.

Bul joly aıdyn ıeleri óz qaqpasyna dop jibergen joq – 17:0.

Maksım Pahomov pen Raýan Isalıev bes-besten gol soqsa, komanda kapıtany Maksım Ótebalıev het-trıktiń avtory atandy. Nurbol Bókeshov qarsylas komanda qaqpasyna 2, Ershat Amangeldıev pen Samat Amanshın bir-bir doptan engizdi.

Osylaısha, upaı sanyn 45-ke jetkizgen «Aqjaıyq» ekinshi topta kósh bastap keledi.

Oraldyqtar kelesi oıyndaryn 3-4 aqpanda óz aıdynynda «Maıak» (Krasnotýrınsk) komandasymen ótkizedi. «Maıak» 40 upaımen úzdik úshtikti túıindep tur.

Eske sala keteıik, budan buryn «Aqjaıyqtyń» óz tobynda kósh bastaǵanyn jazǵan bolatynbyz.