Dopty hokkeı: «Aqjaıyq» qatarynan 20 oıyndy jeńispen aıaqtady

ORAL. KAZINFORM — Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» Ýlıanovsk qalasynda «Volga-Cheremshanmen» ekinshi oıynyn ótkizdi.

Oraldyqtar birinshi taımda 3:0 esebimen alǵa shyqsa, ekinshi kezeńde de sol qarqynynan tana qoıǵan joq. Qorytyndy esep — 8:3.

«Aqjaıyqtan» komanda kapıtany Maksım Ótebalıev tórt goldy óz esebine jazdy. Maksım Pahomov qarsylas qaqpasyna qos dop engizse, Artem Lapshın men Nurbol Bókeshov bir-birden mergendigimen kózge tústi.

Osylaısha, qatarynan 20 matchty jeńispen aıaqtaǵan batysqazaqstandyq klýb enshisinde 69 upaı bar.

«Aqjaıyq» kelesi kezdesýlerin 19-20 aqpanda Verhnıı Ýfaleıde jergilikti «Nıkelşıkpen» ótkizedi.

— Bıyl bizdiń joǵary lıganyń fınaldyq oıyndaryna qatysatynymyz anyq. Fınaldyq básekeniń qashan jáne qaıda ótetini ázirge belgisiz, - dedi Kazinform tilshisine «Aqjaıyqtyń» bas bapkeri Nıkolaı Shavaldın.

Eske sala keteıik, budan buryn «Aqjaıyqtyń» Ýlıanovskide «Volga-Cheremshan» komandasyn jeńgenin jazǵan bolatynbyz.