Dopty hokkeı: «Aqjaıyq» qarsylasyn kambekpen utty

ORAL. KAZINFORM – Dopty hokkeıden Reseıdiń joǵary lıgasynda oınaıtyn «Aqjaıyq» komandasy «Jastar» stadıonynda «Volga-Cheremshanmen» (Ýlıanovsk) ekinshi kezdesýin ótkizdi.

Keshegi match aıdyn ıeleriniń aıqyn basymdyǵymen ótip, Nıkolaı Shavaldınniń shákirtteri 17:4 esebimen jeńiske jetken edi.

Bul joly báseke áldeqaıda tartysty ótip, birinshi taımda aldymen qonaqtar esep ashyp, alda turdy. Degenmen óz sheberliginiń basym ekenin kórsetken oraldyqtar tarazy basyn aýdara bilip, qarsylasyn 9:5 esebimen utty.

«Aqjaıyqtan» reseılik shabýylshy Maksım Pahomov pen komanda kapıtany Maksım Ótebalıev úsh-úshten gol soǵyp, jeńiske súbeli úlesterin qosty. Taǵy bir reseılik Artem Lapshın qos goldyń avtory atansa, Raýan Isalıev te qur ketken joq.

Osy oıynnan keıin 39 upaı jınaǵan batysqazaqstandyq klýb ekinshi topta ázirge birinshi orynǵa kóterilip tur.

«Aqjaıyq» kelesi kezdesýlerin 26-27 qańtarda Oralda «Lokomotıv» (Orynbor) komandasymen ótkizedi.

Eske sala keteıik, budan buryn «Aqjaıyqtyń» qatarynan toǵyz kezdesýinde jeńiske jetkenin jazǵan bolatynbyz.