Dopıngpen ustalǵan sportshylarǵa jazany kúsheıtetin zań kúshine enedi
NUR-SULTAN. QazAqparat – Prezıdent Qasym-Jomart Toqaev «QR Sport jáne dene shynyqtyrý týraly keıbir zańnamalyq aktilerge ózgertýler men tolyqtyrýlar engizý týraly» zańǵa qol qoıdy, dep habarlaıdy QazAqparat tilshisi Dene shynyqtyrý jáne sport komıtetine silteme jasap.
Zań dopıngke qarsy erejelerdi buzǵandardyń jaýapkershiligin qatańdatýǵa, Ulttyq dopıngke qarsy uıymnyń mártebesin kúsheıtýge baǵyttalǵan.
«Qoldanystaǵy zańnamaǵa dopıngke qarsy erejelerdi buzǵany úshin jaýapkershilikti qatańdatý boıynsha ózgerister men tolyqtyrýlar engizý, atap aıtqanda sportshyǵa dopıng taǵaıyndaǵan adamdarǵa qatysty ákimshilik jaýapkershilikti engizý qajettiligi týyndady. ol 200 aılyq eseptik kórsetkish mólsherinde aıyppul túrinde jazany kózdeıdi», - delirngen komıtettiń habarlamasynda.
Sonymen qatar, dopıngti paıdalanǵany úshin zań jobasynda:
- dıskvalıfıkatsııa;
- sportshynyń sporttaǵy nátıjesin joıý jáne biliktilik upaılaryn nemese baldaryn alyp tastaý;
- aqshalaı kótermeleýdi qaıtarý;
- sportshylar men jattyqtyrýshylarǵa ómir boıy aı saıynǵy materıaldyq qamsyzdandyrýdy tóleýdi toqtatý;
- sportshylarǵa, jattyqtyrýshylarǵa jáne klýb komandalarynyń basshylaryna aı saıynǵy aqshalaı qamtýdy toqtatý;
- sporttyq ataǵynan aıyrý;
- Olımpıada, Paralımpıada jáne Sýrdlımpıada oıyndarynyń chempıony jáne júldegeri turǵyn úıdi paıdalaný shartyn buzý;
- sport túrleri boıynsha Qazaqstan Respýblıkasynyń qurama jáne shtattyq qurama komandalarynyń quramynan sportshylardy, jattyqtyrýshylardy shyǵarý jazalary qarastyrylǵan.
Sondaı-aq, zańnamada Olımpıada, Paralımpıada jáne Sýrdlımpıada chempıondary men júldegerlerine 10 jyl merzimge jalǵa baspana berý, sondaı-aq dopıng-testilerdi saqtaý merzimi 10 jyl bolýyna baılanysty osy merzimge atalǵan turǵyn úıdi ıelikten shyǵarýǵa tyıym salý kózdelgen. Eger osy kezeńde synamada dopıng anyqtalmasa, turǵyn úı sportshynyń menshigine beriledi.
