Dopıngpen ustalǵan sportshylar ataǵy men páterinen aıyrylady - mınıstr

ASTANA. QazAqparat - QR Mádenıet jáne sport mınıstri Arystanbek Muhamedıuly Parlament Májilisiniń qaraýyndaǵy zań jobasy aıasynda dopıng paıdalanǵan sportshylardy qandaı jaza kútip turǵanyn aıtty, dep habarlaıdy QazAqparat tilshisi.

«Joǵaryda aıtylǵandarǵa qaraı, qoldanystaǵy zańnamaǵa sportshyǵa dopıng taǵaıyndaǵan adamǵa qatysty dopıngke qarsy qaǵıdalardy buzǵany úshin ákimshilik jaýapkershilikti qatańdatý boıynsha ózgerister men tolyqtyrýlar engizý qajettigi týyndady. Dopıng paıdalanǵany úshin: jarystan shettetý; aqshalaı yntalandyrýdy qaıtaryp alý; sportshylar men bapkerlerge ómir boıǵy aı saıynǵy materıaldyq qamsyzdandyrý tóleminen (sporttyq zeınetaqy) aıyrý; sport túrleri boıynsha QR qurama komandasynyń múshelerin olardyń halyqaralyq sporttyq jarystarda sporttyq jaraqattar alýy jáne mertigýi kezinde ótemaqy tólemderinen aıyrý eskerilgen», - dedi mınıstr Májilistiń jalpy otyrysynda.

Sonymen qatar dopıng paıdalanǵandardy sporttyq ataǵynan aıyrý qarastyrylyp otyrǵanyna toqtalǵan A. Muhamedıuly: «Olımpıada, Paralımpıada jáne Sýrdlımpıada oıyndarynyń chempıondary men júldegerlerine arnalǵan turǵyn úıden aıyrý máselesi eskerilip otyr. Dopıngtiń saldarynan sportshylardy, bapkerlerdi sport túrleri boıynsha Qazaqstan Respýblıkasynyń qurama jáne shtattyq qurama komandalarynyń quramynan shyǵaryp tastaý kózdelgen. Sonymen birge, zań jobasyndaǵy mańyzdy jańalyq - dene shynyqtyrý jáne sport salasynda demeýshilik kómek kórsetý saıasatyn iske asyratyn Biryńǵaı operatordy qurý bolyp otyr», - dedi vedomstvo basshysy.

Budan buryn habarlanǵandaı, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.