Dopıngpen ustalǵan 9 qazaqstandyq Olımpıada júldegeriniń bári - aýyr atletter men balýandar

ASTANA. QazAqparat – Táýelsizdik jyldarynda Olımpıada oıyndarynda jeńimpaz atanyp, júlde alǵan 9 sportshy dopıng qoldanǵany úshin medalinen aıyrylǵany belgili. Olardyń bári aýyr atletıka, erkin jáne grek-rım kúresinen el qorjynyna júlde «salǵan» bolatyn, dep habarlaıdy QazAqparat tilshisi.

Mádenıet jáne sport mınıstrligi Sport jáne dene shynyqtyrý komıtetiniń tóraǵasy Erbol Myrzabosynov redaktsııa saýalyna joldaǵan jaýabynda dopıngtiń arqasynda Olımpıada júldesin alǵan qazaqstandyq sportshylardyń tizimin usyndy.

«Táýelsiz Qazaqstan tarıhynda Ulttyq quramanyń 9 sportshysy dopıng qoldanǵany úshin Olımpıada medalinen aıyryldy. Olar: Ilıa Ilın, Irına Nekrasova, Marııa Grabovetskaıa, Zýlfııa Chınshanlo, Maııa Maneza, Svetlana Podobedova, Nıjat Rahımov (aýyr atletıka), Taımýraz Tıgıev (erkin kúres), Áset Mámbetov (grek-rım kúresi)», - dep jazylǵan jaýapta.

Komıtet basshysy ózge básekelesteriniń dopıng daýyna iligýi Olımpıada minberindegi ornyn bir saty joǵarylatqan sportshylar da bar ekenin eske salady. Halyqaralyq Olımpıada komıtetiniń Tártip keńesiniń sheshimi boıynsha:

Grek-rım kúresiniń sheberi Nurbaqyt Teńizbaev «qolasyn» «kúmiske» aıyrbastasa, tegi reseılik legıoner Alla Vajenına aýyr atletıka «kúmisin» «altynǵa» aýystyryp alǵan edi. Jeńil atlet Olga Rypakovanyń Beıjiń Olımpıadasynda alǵan qola medali arada 9 jyl ótkende «kúmis» bolyp ózgergen. Dál osyndaı sebeppen ziltemishlier Anna Nurmuhambetova (kúmis), Dáýlet Shabanbaı (qola), Denıs Ýlanov (qola) Olımpıadadaǵy jetistikterin jaqsartqan.