Dopıngke qarsy kodeks: AIBA barlyq talapqa saı ma
Bul týraly QR Boks federatsııasynyń baspasóz qyzmeti málim etti.
«Búkilálemdik dopıngke qarsy qaýymdastyq (WADA) atqarýshy komıtetiniń AIBA-ǵa qatysty málimdemesi - boks álemi úshin mańyzdy jańalyq. Sebebi, sport salasyndaǵy dopıng máselesin qatty qadaǵalaıtyn WADA qaharyna ushyraǵan kez-kelgen uıymnyń bolashaǵy bulyńǵyr. Al AIBA bul synnan súrinbeı ótip otyr» delingen federatsııa taratqan aqparatta.
WADA qurǵan arnaıy komıssııa AIBA-nyń dopıngke qarsy kodekske tolyq sáıkestigi jóninde qorytyndy shyǵaryp, WADA atqarýshy komıtetine qoldaıtynyn bildirip usynym engizgen. Sondyqtan, 2019 jyly Reseıdiń Sochı qalasynda ótetin erler arasyndaǵy álem chempıonatyna qatysty barlyq másele sheshimin tapty degen sóz.
Osyǵan qatysty AIBA atqarýshy dırektory Tom Vırgets málimdeme jasady.
«AIBA úshin bul jańalyqtyń orny erekshe. Bizdiń basty maqsatymyz - bokstyń keńinen damýyna qolaıly jaǵdaı jasaý jáne dopıng problemasynyń aldyn alý. Bul baǵytta WADA-men áriptestigimiz odan ári óziniń oń nátıjesin bererine senimdimiz», - dedi ol.