Dopıngke qarsy kúrestiń álemdik kóshbasshylary Astanada jınalady
ASTANA. KAZINFORM — 2026 jylǵy qarashada Astanada Dúnıejúzilik dopıngke qarsy agenttiktiń (WADA) mańyzdy jıyndary ótedi. Atap aıtqanda, elordada uıymnyń Atqarýshy komıteti men Quryltaıshylar keńesiniń (Foundation Board) otyrystary uıymdastyrylady.
Týrızm jáne sport mınıstrliginiń baspasóz qyzmetiniń málimetinshe, halyqaralyq jıyndarǵa dopıngke qarsy kúres salasynyń ókilderi, memlekettik organdardyń, sport uıymdary men ulttyq dopıngke qarsy qurylymdardyń basshylary qatysady. Kezdesýler barysynda jahandyq dopıngke qarsy júıeni damytý, taza sport qaǵıdattaryn nyǵaıtý jáne halyqaralyq yntymaqtastyqty keńeıtý máseleleri talqylanady.
Kún tártibinde Dúnıejúzilik dopıngke qarsy kodeksti iske asyrý, normatıvtik-quqyqtyq bazany jetildirý, bilim berý jáne ǵylymı baǵdarlamalardy damytý, sondaı-aq dopıngke qarsy kúrestiń tıimdiligin arttyrý máseleleri qaralady.
Qazaqstan men WADA arasyndaǵy yntymaqtastyq keıingi jyldary jańa deńgeıge kóterildi. 2025 jylǵy qazanda agenttik prezıdenti Vıtold Banka Qazaqstanǵa tarıhı saparmen kelip, Memleket basshysy Qasym-Jomart Toqaevpen kezdesti. Sapar barysynda Vıtold Banka Qazaqstanda sportty damytýǵa qosqan úlesi úshin II dárejeli «Dostyq» ordenimen marapattaldy.
Qazaqstan men WADA arasyndaǵy yntymaqtastyqty nyǵaıtý maqsatynda 2026 jylǵy 22 naýryzda ózara túsinistik týraly memorandýmǵa qol qoıyldy. Qujatqa QR Týrızm jáne sport mınıstri Erbol Myrzabosynov pen WADA prezıdenti Vıtold Banka qol qoıdy. Kelisim dopıngke qarsy bilim berýdi damytýǵa, dopıng erejelerin buzýdyń aldyn alýǵa, ǵylymı zertteýler júrgizýge jáne halyqaralyq tájirıbe almasýǵa baǵyttalǵan.
Osylaısha, mundaı joǵary deńgeıdegi jıyndardyń Qazaqstanda ótýi elimiz ben WADA arasyndaǵy seriktestiktiń júıeli túrde damyp kele jatqanyn kórsetedi.
— Ulttyq dopıngke qarsy júıeni damytý — Qazaqstannyń memlekettik sport saıasatynyń mańyzdy baǵyttarynyń biri. Halyqaralyq kezdesýler ulttyq dopıngke qarsy uıymdar men álemdik sport qurylymdary arasyndaǵy kásibı tájirıbe almasýǵa, ózara is-qımyldy nyǵaıtýǵa jáne birlesken bastamalardy damytýǵa múmkindik beredi. Sonymen qatar bul jıyndar Qazaqstanda ǵana emes, jalpy Ortalyq Azııa óńirinde dopıngke qarsy kúres júıesin jetildirýge jáne taza sport qaǵıdattaryn ilgeriletýge yqpal etedi, — delingen mınıstrlik taratqan aqparatta.
Aıta keteıik, WADA Quryltaıshylar keńesi — agenttiktiń joǵary basqarý organy. Onyń quramyna olımpıadalyq qozǵalys pen memlekettik bılik organdarynyń ókilderi kiredi. Keńes uıymnyń strategııalyq damý baǵyttaryn aıqyndap, halyqaralyq dopıngke qarsy saıasatqa qatysty negizgi sheshimderdi qabyldaıdy. Al Atqarýshy komıtet agenttiktiń qyzmetine basshylyq jasap, Quryltaıshylar keńesiniń aıryqsha quzyretine kirmeıtin basqarýshylyq sheshimderdi qabyldaıdy.108edited 17:37
