Dopıng qoldanǵanyn moıyndaǵan nemis sportshysy Olımpıada medalin saqtap qaldy

ASTANA. QazAqparat - Seýl Olımpıadasynyń chempıony nemis onsaıysshysy Krıstıan Shenk dopıng qoldanǵanyn moıyndaǵanymen, medalin saqtap qaldy, dep jazady «Habar 24».

GDR atynan óner kórsetken Shenktiń sózine qaraǵanda, ol sporttyq ǵumyrynda únemi dopıng, sonyń ishinde týrınabol steroıdin qoldanǵan.

Sportshynyń enshisinde 1988 jylǵy olımpıada altynynan bólek 1990 jylǵy Eýropa chempıonaty men 1991 jylǵy álem chempıonatynyń qola medaldary bar.  Halyqaralyq olımpıada komıteti 53 jastaǵy Shenktiń shyndyqty jaıyp salǵanyn durys qabyldap, merzimniń baıaǵyda ótip ketýine baılanysty sportshyny júldelerinen aıyrmaımyz dep sheshti.

«Bul jaıttyń buryn bolǵanyn esepke ala otyryp HOK eshqandaı shara qoldanbaıdy. Onyń óz kinásin moıyndaǵany durys boldy jáne aldaǵy ýaqytta bul dopıngpen kúresýge kómektesedi dep oılaımyz», - dep habarlady HOK ókilderi.

1994 jyly karerasyn aıaqtaǵan Shenk televıdenıede jumys istep qana qoımaı, tabysty kásipkerge aınaldy. Burynǵy sportshy qaıyrymdylyqqa da kóńil bólgen, dep jazady Sports.ru.