Dopıng qoldanǵany úshin Aıbol Ábiken tórt jylǵa fýtboldan shettetildi
NUR-SULTAN. QazAqparat - Qazaqstan ulttyq quramasynyń jartylaı qorǵaýshysy, 26 jastaǵy Aıbol Ábiken dopıng qoldanǵany úshin tórt jylǵa fýtboldan shettetildi, dep habarlaıdy QazAqparat tilshisi.
Qazaqstan dopıngke qarsy ortalyǵynan málim etkenindeı, mamyr aıynda Aıbol Ábikenniń aǵzasynan tyıym salynǵan meldonıı (mıldronat) preparaty tabylǵan bolatyn.
Osylaısha, A.Ábiken kásibı fýtbolǵa 2026 jyldyń 29 sáýirinde ǵana, otyz jasqa jaqyndaǵanda orala alady.
Bıylǵy maýsymda jalgerlik quqyǵymen pavlodarlyq «Aqsý» quramynda 7 match ótkizip, 3 gol soqty, 1 nátıjeli pas berdi. Aıbol - almatylyq «Qaırattyń» túlegi, onyń oıynshy retindegi quqyǵy osy komandaǵa tıesili.
Fýtbolshy Qazaqstan quramasy sapynda 14 matchta Albanııa qaqpasyna 1 gol soqty.
Osymen úsh jylǵa jetpeıtin merzim ishinde dopıng tabylǵan Qazaqstan quramasynyń úsh oıynshysy fýtboldan shettetildi. 2020 jyldyń kúzinde BAÁ-niń «Al-Aın» komandasynda dop tepken Baýyrjan Islamhan, al ótken jyly kúzde «Tobyldyń» jartylaı qorǵaýshysy Rýslan Valıýllın eki jyl merzimge fýtbol oınaý quqyǵynan aıyryldy.
Eske sala keteıik, budan buryn «Qyzyljar» - «Aqjaıyq» matchynyń Petropavldan elordaǵa aýystyrylǵanyn jazǵan bolatynbyz.
Bul match búgin «Astana Arena» stadıonynda elorda ýaqytymen saǵat 15.00-de bastalady.
