Dopıng qoldanǵan sportshynyń bapkeri de jaýapqa tartylady – Elsııar Qanaǵatov

ASTANA. KAZINFORM –  Olımpıada oıyndaryna lıtsenzııa jeńip alǵan sportshylar jarysqa adal qatysýy kerek. «Dopıng qoldanyp, chempıon bolamyn» degen oıdan arylatyn ýaqyt jetti.

Bul týraly Kazinform tilshisine bergen suhbatynda Olımpıadaǵa daıyndyq shtabynyń jetekshisi Elsııar Qanaǵatov aıtyp berdi.

«Parıj Olımpıadasynyń bastalýyna sanaýly kúnder qaldy. Búginge deıin el sportshylary 17 sport túrinen 50 joldama jeńip aldy. Endi osy lıtsenzııaǵa qol jetkizgen oıynshylarymyz dopıng qoldanyp qoıýdan erekshe saqtanýy tıis. Bul máseleni ár sportshynyń jeke bapkerleri de basty nazarda ustaýy kerek. Eger shákirti tıym salynǵan preparattar qoldanǵan jaǵdaıda, bapkerleri de jaýap beretin bolady. Sebebi búgingi tańda dırektsııa tarapynan olardyń barlyǵy oqý-jattyǵý jıyndarymen tolyq qamtamasyz etildi. Sondaı-aq, medaldar men lıtsenzııalarǵa úmitker sportshylardyń materıaldyq jaǵdaıyn qoldaý úshin kelisimsharttar somasy da ulǵaıtyldy. Qaıda barsa da, sporttyq kıim, jaıly jatar oryn, tamaq, jolaqylary, barlyǵy memlekettiń qarjysymen qamtamasyz etilgen. Osyndaı qoldaýdy sezine turyp, dopıng daýyna ilikken sportshylarǵa keshirim joq», - dedi Elsııar Qanaǵatov.

Esterińizge sala keteıik, XXXIII jazǵy Olımpıada oıyndary Frantsııa astanasy Parıj qalasynda 26 shilde-11 tamyz aralyǵynda ótedi.

Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.