Dopıng qoldanǵan qazaqstandyq tennısshi 4 jylǵa jarystan shettetildi
ASTANA. KAZINFORM — Qazaqstandyq tennısshi, 21 jastaǵy Aryslanbek Aıtqulovtyń antıdopıng erejelerin buzǵany anyqtaldy.
Tennıs ádildigin qamtamasyz etý jónindegi halyqaralyq agenttiginen (ITIA) taralǵan málimetke qaraǵanda, odan 2024 jyldyń qańtarynda alynǵan synamadan tyıym salynǵan LGD-4033 jáne metılgeksanamın tabylǵan.
Aryslanbek Aıtqulov aǵzasyna tyıym salynǵan zattardyń baıqaýsyzda túskenin dáleldeı almady.
Álemdik reıtıngide 2023 jyly qarashada 1 250-orynǵa deıin kóterilgen qazaqstandyq tennısshi 2024 jyly qańtarda Dohadaǵy ITF týrnıri kezinde synama tapsyrǵan. Onyń qanynan tyıym salynǵan zattar tabylǵannan keıin tennısshi ýaqytsha jarystan shettetilgen.
Bıylǵy 30 maýsymda qashyqtan tyńdalym bolyp, táýelsiz trıbýnal Aryslanbek Aıtqulovty jarystarǵa qatysýdan 4 jylǵa shettetti. Oıynshy qatysqan týrnırlerdiń oǵan qatysty nátıjeleri, tapqan tabysy men reıtıngilik upaılarynyń kúshi joıylady.
Shettetý merzimi 2024 jylǵy 23 naýryzdan bastalyp, 2028 jyly 22 naýryzda aıaqtalady. Osy ýaqytta qazaqstandyq tennısshige kez kelgen tennıs sharalaryna qatysýǵa, oınaýǵa jáne jattyǵý jasaýyna tyıym salynady.
Eske sala keteıik, budan buryn tennısten álemniń birinshi raketkasy dopıng daýyna qalǵanyn jazǵan edik.