Dopıng qoldanǵan 7 ziltemirshi eki jyl boıy jarystarǵa qatysa almaıdy

ALMATY. QazAqparat - Qazaqstannyń aýyr atletıka federatsııasy men Ulttyq dopıngke qarsy ortalyq birlesip, tyıym salynǵan preparattardy qoldaný boıynsha sportshylar men bapkerlerge qatysty tekserý júrgizdi, dep habarlaıdy QazAqparat tilshisi.

Aýyr atletıka federatsııasynyń habarlaýynsha, dopıngke qarsy erejeni jeti ziltemirshi buzaǵan. Atap aıtar bolsaq, Arýjan Kólbaı (Almaty), Gúldana Júnis (Almaty), Asyljan Bektaı (Qyzylorda oblysy), Álisher Seıitqazy (Almaty), Erasyl Keńesbaev (Almaty), Maksım Nıý (Shymkent) jáne Tımýr Hasarov (Almaty oblysy).

Olardyń barlyǵy eki jyl boıy jarystarǵa qatysa almaıdy.

Sonymen qatar, osy sportshylardy jattyqtyrǵan eki bapker tórt jylǵa qyzmetinen shettetildi. Olar - aýyr atletıkadan respýblıkalyq sport kolledjiniń jattyqtyrýshysy Aıbol Kólbaev pen Almaty qalasyndaǵy mamandandyrylǵan joǵary sport sheberligi mektebiniń bapkeri Talǵat Áben.