Dopıng daýynan keıin sportqa oralǵan Ilıa Ilın josparlarymen bólisti
ASTANA. QazAqparat - Qazaqstandyq aýyr atlet, álemniń tórt dúrkin chempıony Ilıa Ilın óziniń aldaǵy ýaqyttaǵy josparlarymen bólisti, dep habarlaıdy QazAqparat tilshisi.
«Bolashaq josparlarym týraly aıtyp ótkim keledi. Qazirgi dene qalpymnyń kúıi jaman emes. Salmaǵym - 101-103 keli aralyǵynda. Biz salmaq kategorııalaryn kútip otyrmyz. ıAǵnı, bir aıdan keıin álemdik aýyr atletıkada qandaı salmaqta óner kórsetetinim belgili bolady», - deıdi sportshy OKQ-da ótken baspasóz máslıhatynda.
Sportshy qazirgi ýaqytta salmaqty ne ósirip, ne kemitip almaýdy baqylap júrgen kórinedi.
«Jumada julqı kóterýde 172 kelini, serpe kóterýde 212 kelilik kórsetkishti kórsettim. Qazirgi kezeńde jaǵdaı jaqsy. Bapkerimniń maǵan kóńili tolyp otyr. Álbette, 22 jyldyq sporttyq mansabym bolǵandyqtan, aıaqqa salmaq túsip, jaraqat alyp qalatyn kezderim bar. Bul álbette qalypty nárse. Biraq, jalpy meniń oıymsha, jaǵdaıym 90 paıyzǵa jaqsy. Ary qaraı jaqsara beredi degen oıdamyn», - deıdi ol.
Ilınniń aıtýyna qaraǵanda, qyrkúıek aıynda Qazaqstan chempıonaty bolady.
«Men sonda óner kórsetýge bel býyp otyrmyn. Bárine de shart birdeı: barlyǵymyz Qazaqstan chempıonatynan ótip, Álem chempıonatyna barýymyz kerek. Sol syndardy baǵyndyrsaq, Tokıo Olımpıadasyna lıtsenzııany alamyz. Ázirge maqsatym - Qazaqstan chempıonatyn utý. Tolyq daıynmyn. Jeńisti qalaımyn. Maǵan tek jeńis kerek», - dedi Ilıa Ilın.
