Dopıng daýyna ilikken Jasulan Qydyrbaev jańa qyzmetke taǵaıyndaldy
Mádenıet jáne sport mınıstri Arystanbek Muxamedıulynyń aıtýynsha, búginde árbir sportshynyń óz nıet-ótinishi bar. "Máselen, bireýi jattyqtyrýshyǵa aýyssaq deıdi, ekinshisi otbasymen bolamyz deıdi. Jasulan Qydyrbaevty Almatydaǵy arnaıy sport mektebine (Olımpıada rezerviniń respýblıkalyq mamandandyrylǵan mektep-ınternat-avt.) dırektordyń orynbasary qyzmetine usyndyq. Óziniń de sondaı armany bar. Jas balalarmen jumys istegim keledi deıdi. Sosyn Podobedovanyń da jumys týraly óz oılary bar. Qazir jattyqtyrýshy retinde jumysqa ornalasamyn dep, qarastyryp jatyr. Árıne, bizdiń negizgi mindetimiz - olardy memlekettiń qaraýynan tys qaldyrmaý", - dedi A.Muxamedıuly QazAqparat tilshisine bergen suxbatynda. Al "Árbir sportshynyń jumysqa turǵyzasyz ba?" degen suraqqa mınıstr: "Qazir biz Jasulandy jumysqa ornalastyrdyq. Endi, árqaısysymen jeke-jeke jumys isteımiz. Biraq shynyn aıtqanda, ózderiniń sharýalary bar, raqmetin aıtyp jatyr", - dep atap kórsetti.
Aıta keteıik, kúni keshe Olımpıadanyń eki dúrkin chempıony Ilıa Ilın ulttyq jáne shtattyq komandalar dırektsııasynyń keńesshisi qyzmetine taǵaıyndaldy. Búgin ol óz jumysyna kiristi. A.Muxamedıulynyń aıtýynsha, Memleket basshysy dopıng daýyna ilikken sportshylardy nazardan tys qaldyrmaı, qoldaý jasaýdy tapsyrdy. "Bizdiń ustanymymyz - Halyqaralyq Olımpıada komıteti qandaı qorytyndy shyǵarsa da, árbir sportshy óziniń qabilet-qarymyn barynsha paıdalanyp, ómirlik tájirıbesin keıingi izbasarlaryna qaldyrýy qajet", - deıdi mınıstr.
