Dopıng daýy: Jeńil atletıkadan tuńǵysh álem chempıony qazaqstandyq Nora Djerýtoǵa qatysty sheshim áli shyqqan joq
Nora Djerýto 2018 jyly Qazaqstan Respýblıkasynyń azamattyǵyn alǵan bolatyn. Byltyrdan beri Qazaqstan atynan resmı jarystarǵa qatysa bastaǵan sportshy 3000 metr qashyqtyqqa kedergilermen júgirý saıysynda Álem chempıony atanǵan bolatyn. Bul – Qazaqstannyń atalǵan sport túrinen Álem birinshiliginde ıelengen alǵashqy altyn medali.
Kenııa týmasy Qazaqstanǵa 2017 jyly qonys aýdaryp, 2019 - 2022 jyldar aralyǵynda Qazaqstan atynan jarystarǵa qatysý quqyǵyn rásimdeýmen aınalysty. Oǵan deıin Óskemende irgesi qalanǵan Altay Athletics klýbynyń atynan synǵa túsip júrdi.
Bıylǵy sáýir aıynda Nora Djerýto dopıng qoldandy degen kúdikke ilindi. Osylaısha 27 jastaǵy jelaıaq alda bolatyn jarystardan ýaqytsha shettetilip otyr.
Mundaı sheshimdi jeńil atletıkadaǵy jaǵymsyz qubylystarmen kúresetin táýelsiz organ Athletics Integrity Unit (AIU) qabyldaǵan.
«Nora Djerýto aýrý saldarynan týyndaǵan bıologııalyq pasportyndaǵy ózgeristerdi tolyq túsindiretin medıtsınalyq qujattar men qorytyndyny AIU komıssııasyna usyndy. AIU tergeýi áli aıaqtalǵan joq, qazirgi ýaqytta Nora Djerýtoǵa dopıng qoldaný týraly qorytyndy sheshim shyqpady», - dedi vıtse-mınıstr Sársen Quranbek QazAqparat tilshisine bergen suhbatynda.
Sonymen birge, vıtse-mınıstr legıonerlerge shaqyrý jiberý federatsııalardyń quzyretinde ekenin, ıaǵnı sheshimdi tek ózderi qabyldaı alatynyn aıtty.
«Eger legıonerler bizdiń sportshylarymyzǵa jaqsy yqpal etse, olarmen de jumys jasaýǵa bolady. Degenmen eń aldymen ózimizdiń sport mektepteriniń túlekterin qoldaýymyz kerek», - deıdi S. Quranbek.
Tamyzdyń úshinshi jeksenbisi – Sport kúni aıasynda vıtse-mınıstr Sársen Quranbekpen tolyq suhbat 18 tamyz kúni jarııalanady.
