Dopıng daýy: rýmyn sportshysy barlyq syıaqysynan aıyryldy
ASTANA. QazAqparat - Lozanadaǵy Sporttyq arbıtraj soty (CAS) rýmyn ziltemirshisi Gabrıel Sınkraıandy Olımpıadanyń qola júldegeri ataǵynan aıyrý týraly sheshim shyǵardy. Endi, onyń medali tórtinshi oryn alǵan qazaqstandyq atlet Denıs Ulanovqa tabystalýy tıis, dep xabarlaıdy QazAqparat tilshisi Vesti.kz saıtyna silteme jasap.
Jaqyn arada Halyqaralyq Olımpıada komıteti Sınkraıannyń dıskvalıfıkatsııasy boıynsha tıisti sheshim shyǵaryp, qola medaldi Ulanovqa tapsyrýǵa nusqaý berýi kerek. Al rýmyn ziltemirshisin ómir baqı sporttan shettetýi ábden múmkin. Sebebi osymen ol ekinshi ret dopıng daýyna iligip otyr. Óz elinde G.Sınkraıannan qola medal úshin alǵan barlyq syıaqyny alyp qoıdy. Ony Olımpıada júldegerlerine qurmet kórsetý sharasyna da shaqyrǵan joq.
Aıta keteıik, buǵan deıin QazAqparat tilshisine suxbat bergen D.Ulanov qola medalin ala almaı júrgeni jaıynda aıtqan. «Endi, qazir rýmyn (Gabrıel Sınkraıan - avt.) sottasyp jatyr. Sondyqtan óz medalimdi áli alǵan joqpyn", - dedi ol.
Rıo-de-Janeıroda ótken bıylǵy Olımpıada oıyndary kezinde 85 kelige deıingi salmaq dárejesinde rýmyndyq ziltemirshi jalpy esep boıynsha 390 keli kóterip, úshinshi oryn alǵan bolatyn. Denıs Ulanov barlyq múmkindikterin týra sondaı kórsetkishpen aıaqtaǵan edi. Alaıda óz salmaǵy aýyr bolǵannan keıin tórtinshi oryndy qanaǵat tutty.
