Dopıng daýynan keıin Jánibek Álimhanulynyń kásipqoı bokstaǵy mansaby qalaı órbıdi

ASTANA. KAZINFORM — Bokstan orta salmaqtaǵy WBO jáne IBF nusqasy boıynsha álem chempıony Jánibek Álimhanulynyń menedjeri Berik Sultan sportshynyń dopıngke qatysty jaǵdaıy qalaı bolyp jatqany jáne budan keıin qalaı órbıtini týraly aıtty. 

Berik Sultannyń sózinshe, boksshyǵa qatysty másele 8 qańtarǵa josparlanǵan V synamasyn ashý nátıjesinen keıin sheshiledi. 

— Bul boıynsha eki stsenarıı bar. Eger 8 qańtarda synama taza bolǵan jaǵdaıda barlyq ataqty saqtap qalamyz jáne mansabymyzdy jalǵastyramyz. Biz osylaı bolady dep úmittenimiz. Óıtkeni, shyndyq bizdiń jaǵymyzda ekeni aıqyn. Eger jaǵdaı basqasha órbıtin bolsa, Jánibek ataqtarynan aıyrylyp, bokstan belgili bir merzimge shettetilýi múmkin. Mundaı jaǵdaı tirkelse de biz oǵan moıymaımyz. Alǵa qaraı qadam basa beremiz. Ol áli jas, mansaby aıaqtalǵan joq, - dedi Berik Sultan.

Berik Sultannyń aıtýynsha, Jánibek Álimhanuly qazir Qazaqstanǵa oraldy jáne jaqyndarymen birge ýaqytyn ótkizip jatyr. 

— Biz — tazamyz. Adalmyz. Ózimizge senimdimiz. Bul sporttyń qyr-syryn bilemiz jáne resmı sheshimdi kútemiz. Qazaq Style-dyń atynan, ózimniń atymnan jáne Jánibektiń atynan sizderge zor alǵys bildirgim kelip otyr. Mansabymyzǵa qaýip tóngen sátte, shynymen qıyn bolǵan kezde halqymyz bizge jaqyn boldy, qoldady, senim bildirdi, bizge úmit artatynyn aıtty. Bul rýhymyzdy shynymen kóterdi. Buǵan deıin qansha qan, qansha ter tógildi, qansha ýaqyt jumsaldy. Biz kezekti bıik belesti baǵyndyrýǵa óte jaqyn edik. Sol sátte daýly jaǵdaıǵa tap boldyq. Adamdardyń qoldaýy, sportshylardyń sózderi, jyly pikirler bizge osyǵan tótep berýge kómektesti, - dedi Berik Sultan. 

Aıta ketsek, Jánibek Álimhanuly dopıng testten ótpeı qalýyna baılanysty 7 jeltoqsanǵa josparlanǵan kýbalyq Erıslandı Laramen jekpe-jegi bolǵan joq.