Dopıng daýyna ilikpes úshin sportshylarymyz ne isteýi kerek
ASTANA. KAZINFORM — Olımpıada oıyndaryna baratyn sportshylarymyz dopıng daýyna ilikpes úshin tek vıtamın jáne dári-dármek qoldanǵanda ǵana saq bolmaı, kúndelikti tamaqtaný barysynda da abaılaǵany jón.
Bul týraly Kazinform tilshisine suhbat bergen Qazaqstan Respýblıkasynyń dopıngke qarsy ulttyq ortalyǵynyń basshysy Maıra Baqasheva aıtyp berdi.
«Olımpıada oıyndary kún sanap jaqyndap keledi. Sportshylarymyz basty dodada basy dopıng daýyna ilikpes úshin qazirden saqtyq tanytýy kerek. Dopıng degen — tek qana kúsh beretin dári-dármek ishý emes, ol qalaı bolsa solaı tamaqtanýdan da bolady. Qazirgi máseleniń biri — sportshylardyń dopıngpen lastanǵan taǵam qospalaryn qoldanýy. Bizdiń ortalyqtyń mamandary árqashan sportshylar men jattyqtyrýshylar quramyn taǵamdyq qospalardy qaýipsiz paıdalanýdyń mańyzyn basty nazarda ustaýǵa shaqyryp keledi. Ónim óndirýshiler men satýshylar óz tutynýshysyna ónimniń qaýipsizdigine kepildik beretinine qaramastan biz sol ónimderdi tekserý barysynda lastanǵan, ıaǵnı olardyń quramynda tyıym salynǵan zattar bolatynyn jıi kórip júrmiz. Sondyqtan taǵamdyq qospany qoldanar aldynda quramyn, qaptamasyn jáne óndirýshi orynnyń búkil aqparatyn muqııat zerdeleýdi usynamyz», — deıdi dopıngke qarsy ulttyq ortalyq basshysy.
Sonymen qatar Maıra Baqasheva sportshylardan dopıng synamasy qalaı alynatynyn da jasyrmaı aıtty.
«Sportshynyń synamasyndaǵy dopıngti anyqtaıtyn taldaýdy DDQA akkredıttegen táýelsiz zerthanalar júrgizedi. Oń nátıje anyqtalsa, QazDQUO habarlama alady, synaqtyń oń nátıjesi týraly sportshy men federatsııaǵa habarlaıdy jáne tyıym salynǵan zattyń sportshynyń denesine qalaı túskenin anyqtaý úshin tergeý protsesin bastaıdy. Búkil protsester halyqaralyq kodqa jáne halyqaralyq WADA standarttaryna sáıkes júzege asady», — dedi ol.
Esterińizge sala keteıik, XXXIII jazǵy Olımpıada oıyndary 26 shilde men 11 tamyz aralyǵynda ótedi.
