Dopıng daýy: WBO ishki tergeý protsesin bastaıdy

ASTANA.KAZINFORM – Dúnıejúzilik boks uıymy (WBO) osy tujyrym boıynsha orta salmaqtaǵy álem chempıony Jánibek Álimhanulynyń dopıng testten ótpeı qalýyna qatysty resmı málimdeme jarııalady.

WBO erikti dopıngke qarsy qaýymdastyqtan (VADA) taldaý qorytyndysy týraly resmı habarlama alǵanyn rastady.

- Uıym erejelerine sáıkes jáne adaldyqqa, sportshylardyń qaýipsizdigine jáne ádil básekelestikke degen mindettememizdi qaıta rastaı otyryp, WBO ishki tergeý protsesin bastaıdy. Sportshylarǵa jáne onyń ókilderine tolyq quqyqtar, tıisti rásimder jáne barlyq tıisti aqparatty, túsiniktemelerdi jáne qujattamany usyný múmkindigi beriletin «Sebepti kórsetý týraly habarlama» jiberiledi, - delingen resmı málimdemede.

WBO barlyq qatysýshyǵa dopıngke qarsy is-sharalar qatań jaýapkershilik saıasaty boıynsha júrgiziletinin eske saldy.

- Osy saıasatqa sáıkes, eger sportshynyń synamasynda tyıym salynǵan zat tabylsa, WBO nıet, kiná, nemquraılylyq nemese qasaqana paıdalanýdy dáleldeýge mindetti emes. Tyıym salynǵan zattyń onyń denesine enbeýin qamtamasyz etý sportshynyń mindeti bolyp sanalady jáne sportshy anyqtalǵan kez kelgen tyıym salynǵan zat úshin tolyq jaýapty bolady, - dep atap ótti uıym.

WBO bul másele qazir belsendi tergeý ústinde bolǵandyqtan jáne protsestiń tutastyǵyn saqtaý úshin qazirgi ýaqytta eshqandaı túsinikteme bermeıtinin, barlyq tarap WBO erejelerine sáıkes kez kelgen sheshimder nemese áreketter týraly jazbasha túrde habardar etiletinin málimdedi.

Osyǵan deıin habarlaǵanymyzdaı, tanymal «The Ring magazine» kásipqoı boks basylymy Jánibek Álimhanulynyń VADA synamasy oń nátıje kórsetkenin habarlaǵan edi.

Jánibek Álimhanuly áleýmettik jelidegi paraqshasynda dopıng daýyna qatysty óz pikirin aıtty.

Jánibek Álimhanuly jáne Erıslandı Lara arasyndaǵy orta salmaqtaǵy WBO, IBF jáne WBA belbeýleri úshin birikken tıtýldyq jekpe-jek osy jekskebi AQSh-tyń Tehas shtatynda ótedi dep josparlanǵan bolatyn.