Dońyzdyń basyn meshitke laqtyryp ketken brıtandyq jazaǵa tartyldy
ASTANA. 29 qańtar. QazAqparat - Brıtanııalyq Nıýberı qalasynyń soty musylmandardyń qulshylyq úıin qorlaǵan er adamdy 3 aı bas bostandyǵynan aıyrdy. Bul jaıynda islamenfrance.fr aqparat portaly habar taratty.
muslim.kz saıtynyń jazýynsha, ótken jyldyń qazan aıynda 21 jastaǵy Ulybrıtanııa turǵyny Rorı Roýbottom London shaharynan 90 shaqyrym jerde ornalasqan Berkshır graftyǵyna qaraıtyn Nıýberı qalasyndaǵy meshittiń túbine dońyzdyń basyn qoıyp ketken bolatyn.
Musylmandardyń janyn túrshiktirgen bul sumdyq, brıtan bıliginiń de jaǵasyn ustatty. Brıtan saıasatkerleriniń keıbireýleri dinı jáne ulttyq kemsitýshilikke jol bergenderdiń basynan «sıpaı qoımaıtyn» jańa zań jobasyn jazýǵa kirisken edi.
Sońǵy sot otyrysynda qylmysker óziniń kináli ekenin moıyndap, istegen isine ókinetinin jetkizdi.
«Musylman jamaǵaty ózge nanym-senimdegilerdiń qylyǵyna tózip keldi. Alaıda, shydamnyń da shegi bar. Kez kelgen bireý ózge adamnyń nemese jamaǵattyń nanym-senimine kúle qarap, irgeden shı júgirtýine jol berýge bolmaıdy. Al keleńsiz áreketke bastaǵandar jazalanýy tıis», - dep málimdedi Nıýberı musylman jamaǵatynyń ókili Lakı Nızamı sotta sóılegen sózinde.
«Dinı astary bar mundaı jaǵdaılar polıtsııa men qoǵam nazarynan tys qalmaýy kerek. Elimizdegi kez kelgen dinge qurmetpen qaraýymyz qajet. Roýbottomnyń basyndaǵy bul jaǵdaı ózgelerge sabaq bolady dep oılaımyn», - dedi osy istiń anyq-qanyǵyn anyqtaýmen aınalysqan Nıýberı polıtsııasynyń ınspektory Lındsı Fınch.
