Donorlyq kórsetkish boıynsha Astana, Almaty jáne Shymkent kósh bastap tur
ASTANA. KAZINFORM – Jyl saıyn 14 maýsymda Dúnıejúzilik qan donory kúni atap ótiledi.
Qazaqstanda jyl saıyn 200 myńnan astam azamat qan donory atanady. Donorlardyń sany boıynsha Astana, Almaty jáne Shymkent qalalary aldyńǵy orynda. Bul iri qalalarda halyq sanynyń kóp bolýyna baılanysty qan men donorlarǵa degen qajettiliktiń de joǵary bolýymen túsindiriledi. Donorlardyń azamattyq jaýapkershiligi men janashyrlyǵynyń arqasynda elimizdiń medıtsınalyq uıymdary kún saıyn operatsııalar júrgizýge, onkologııalyq aýrýlardy emdeýge, jol-kólik oqıǵalarynan zardap shekkenderge, aýyr jaraqat alǵan patsıentter men jańa týǵan nárestelerge kómek kórsetý úshin qajetti qan komponentterimen qamtamasyz etiledi.
2025 jyldyń qorytyndysy boıynsha respýblıkada qan men onyń komponentteriniń 255 255 donatsııasy júzege asyryldy. Bul kórsetkish azamattardyń joǵary áleýmettik jaýapkershiligin jáne qan qyzmetiniń turaqty damýyn aıǵaqtaıdy.
Donorlyq qozǵalysta qurmetti donorlardyń orny erekshe. Olar – qan men onyń komponentterin 50 retten astam tapsyrǵan azamattar. Olardyń óteýsiz donorlyqty damytýǵa jáne adam ómirin saqtap qalýǵa qosqan úlesiniń mańyzy orasan zor.
Qarapaıym, janashyr ári áleýmettik jaýapkershiligi joǵary azamattar qataryndaǵy qurmetti donorlar Qazaqstan Respýblıkasy Densaýlyq saqtaý mınıstrliginiń «Densaýlyq saqtaý isine qosqan úlesi úshin» vedomstvolyq nagradasymen marapattaldy.
Jalpy, elimizdegi donorlyq qozǵalys turaqty ári júıeli sıpatqa ıe. Qazaqstanda jyl saıyn 180 myńnan astam azamat donor bolyp, 255 myńnan astam donatsııa jasaıdy. Bul jyl saıyn 80 myńnan astam patsıentti sapaly qan quıý qyzmetimen qamtamasyz etýge múmkindik berip, olardyń ómirin saqtap qalýǵa jáne saýyǵýyna úlken múmkindik beredi.
«Halyq densaýlyǵy jáne densaýlyq saqtaý júıesi týraly» Kodekske sáıkes medıtsınalyq tekserýden ótý jáne qan men onyń komponentterin tapsyrý kúnderi donor bolyp tabylatyn qyzmetker jumys berýshiniń tarapynan jumystan bosatylady jáne oǵan ortasha jalaqysy saqtalady.
Qan ortalyqtarynyń málimetinshe Dúnıejúzilik qan donory kúni – tek donorlarǵa arnalǵan mereke ǵana emes, sonymen qatar qoǵam nazaryn erikti ári óteýsiz donorlyq máselelerine aýdarýǵa múmkindik beretin mańyzdy alań.
Aıta ketelik el boıynsha Apattar medıtsınasy ortalyǵynyń qyzmetkerleri qan tapsyrý aktsııasyn ótkizgen edi.
