Donor tapsyrǵan qannan ınfektsııa anyqtalǵan jaǵdaıda ne isteý kerek
ASTANA. KAZINFORM — Qazaqstanda donor tapsyrǵan árbir qan úlgisi halyqaralyq jáne ulttyq talaptarǵa sáıkes zerthanalyq tekserýden ótedi. Eger zertteý barysynda ınfektsııalyq markerler anyqtalsa, qan ortalyǵy donordy qosymsha tekserýge jiberedi. Bul týraly Transfýzıologııa ǵylymı-óndiristik ortalyǵy Kazinform agenttiginiń resmı saýalyna bergen jaýabynda málim etti.
Transfýzıologııa ǵylymı-óndiristik ortalyǵy Qoǵammen baılanys jáne yntymaqtastyq bóliminiń basshysy Alma Demeýovanyń aıtýynsha, árbir donordan alynǵan qan birneshe ınfektsııaǵa mindetti túrde tekseriledi.
— Barlyq donatsııa AITV-ınfektsııasyna, V jáne S vırýsty gepatıtterine, merezge jáne anti-HBc, anti-HBs transfýzııalyq jolmen beriletin ınfektsııalarǵa tekseriledi, — dedi Alma Demeýova.
Eger zerthanalyq tekserý barysynda ınfektsııalyq markerler anyqtalsa, mamandar eń aldymen donormen baılanysqa shyǵyp, dárigerdiń qabyldaýyna shaqyrady.
— Qan ortalyǵynyń mamandary donormen mindetti túrde baılanysqa shyǵyp, zerthanalyq tekserý nátıjeleri týraly habarlaıdy. Qabyldaý barysynda dáriger zertteý nátıjelerin túsindirip, qajetti medıtsınalyq keńes beredi jáne ári qaraı qandaı tekserýlerden ótý kerektigi jóninde usynymdar beredi, — dedi bólim basshysy.
Sonymen qatar, bul aqparat donor tirkelgen emhanaǵa joldanady. Bul qosymsha tekserý júrgizip, qajet bolǵan jaǵdaıda dıagnozdy naqtylaý jáne medıtsınalyq baqylaýdy uıymdastyrý úshin qajet.
— Mundaı sharalardyń barlyǵy donordyń densaýlyǵyn qorǵaýǵa, der kezinde medıtsınalyq kómek kórsetýge jáne qan komponentteriniń qaýipsizdigin qamtamasyz etýge baǵyttalǵan, — dedi Alma Demeýova.
Aıta keteıik, sońǵy 10 jylda elimizde 1,6 mln-nan astam adam qan tapsyrǵan.
