Donor men retsıpıenttiń sáıkestigin baǵalaıtyn AI qalaı jumys isteıdi
ASTANA. KAZINFORM — Qazaqstandyq CortexAI startapy transplantologııa salasyna arnalǵan jasandy ıntellekt júıesin ázirlep jatyr.
Júıe donor men retsıpıenttiń ımmýnologııalyq jáne genetıkalyq kórsetkishterin salystyryp, aǵzanyń sáıkestik yqtımaldyǵyn birneshe sekýnd ishinde anyqtaı alady. Ázirleýshi JI múmkindigin Jibek Joly telearnasynyń «Búgin LIVE» baǵdarlamasynda túsindirip berdi.
CortexAI kompanııasynyń negizin qalaýshy ári bas dırektory Asyljan Abdýllaevtyń aıtýynsha, startap bastapqyda onkologııa baǵytyna arnalǵan joba retinde qolǵa alynǵan. Keıin halyqaralyq is-sharalardyń birinde qatysýshylarmen pikir almasqannan keıin komanda transplantologııa salasyna kóshken.
Onyń aıtýynsha, júıe dárigerlerge donor men retsıpıenttiń derekterin bir platformada salystyrýǵa múmkindik beredi. Ákimshilik panelge eki taraptyń medıtsınalyq aqparaty engizilip, 33 ımmýnologııalyq jáne genetıkalyq faktor mashınalyq oqytý algorıtmderi arqyly burynǵy klınıkalyq jaǵdaılarmen salystyrylady. Sonyń nátıjesinde júıe aǵzanyń sáıkestik yqtımaldyǵyn esepteıdi.
Ázirleýshilerdiń málimetinshe, tolyq taldaý shamamen 33 sekýndta daıyn bolady. Bul ásirese shuǵyl transplantatsııa kezinde mańyzdy bolýy múmkin. Máselen jol-kólik oqıǵasynan keıin keıbir aǵzalardy transplantatsııalaýǵa jaramdy ýaqyt birneshe saǵatpen ǵana shekteledi.
Joba avtorlarynyń aıtýynsha, búginde donor men retsıpıenttiń sáıkestigin qolmen esepteý jáne túrli kórsetkishterdi salystyrý keı jaǵdaıda 12-24 saǵatqa deıin sozylýy múmkin. Al jańa júıe osy jumysty avtomattandyrýdy kózdeıdi.
— Ázirge mashınalyq oqytý modeliniń dáldigi 86 paıyz. Biz bul kórsetkishti klınıkalyq qoldanýǵa qajetti 90 paıyzdan joǵary deńgeıge jetkizýdi josparlap otyrmyz. Osy maqsatta jobaǵa ınvestıtsııa tartylyp, klınıkalyq synaqtar men pılottyq jobalardy keńeıtý jumystary júrgizilip jatyr, — deıdi ol.
Qazirgi ýaqytta júıe elordadaǵy birneshe klınıkada synaqtan ótip jatyr. Asyljan Abdýllaevtyń aıtýynsha, dárigerler júıeniń transplantatsııa kezindegi sheshim qabyldaý ýaqytyn únemdep, donorlyq aǵzany tıimdi paıdalanýǵa yqpal etýi múmkin ekenin atap ótken.
Sonymen qatar sońǵy sheshimdi medıtsınalyq mamandar qabyldaıtyny jáne AI júıesi tek qosymsha qural retinde qoldanylatynyn da erekshe atap ótti.
Aıta keteıik, buǵan deıin, kim qan donory bola almaıtyny jaıly jazǵan edik.
