«Donor bol jáne úmit syıla»: Almatyda aýqymdy qan tapsyrý aktsııasy ótti
ALMATY. KAZINFORM – Almaty qalalyq kardıologııalyq ortalyǵynda Respýblıkalyq qan ortalyǵymen birlesip aýqymdy Donor kúni uıymdastyryldy. Bul týraly Densaýlyq saqtaý mınıstrligi habarlady.
Aktsııa Densaýlyq saqtaý mınıstrligi bastamashy bolǵan «Donor bol jáne úmit syıla» respýblıkalyq estafetasy aıasynda ótti. Ortalyq erikti donorlyq mádenıetin damytýǵa baǵyttalǵan jalpyulttyq bastamany qoldap, donorlyq qozǵalys estafetasyn qabyldady. Іs-shara ortalyq qyzmetkerlerin, seriktes uıymdardyń ókilderin, Almaly aýdany ákimdiginiń qyzmetkerlerin jáne beıjaı qaramaıtyn qala turǵyndaryn biriktirdi.
Donorlyq qozǵalysqa ortalyqtyń dárigerleri men medıtsına qyzmetkerleriniń ózderi qosylǵany erekshe mánge ıe boldy. Kún saıyn operatsııalyq jáne reanımatsııa bólimderinde patsıentterdiń ómirin saqtap júrgen mamandar bul kúni donor retinde de kómek kórsetip, jeke úlgisimen aktsııany qoldap, qan qoryn tolyqtyrdy. Іs-shara aýqymy jaǵynan buryn-sońdy bolmaǵan deńgeıde ótti: buǵan deıin ortalyq bazasynda kóshpeli donorlyq aktsııalar ótkizilmegen. Bul kúni 95 adam qatysyp, mindetti medıtsınalyq tekserýden keıin olardyń 60-y qan tapsyrýǵa jiberildi. Donorlar sany boıynsha bul Almatydaǵy osyndaı korporatıvtik bastamalardyń eń joǵary kórsetkishteriniń biri boldy.
– Biz donorlyq qan men onyń komponentteriniń negizgi tutynýshylarynyń birimiz. Bizdiń patsıentter úshin árbir donatsııa – ómirge berilgen naqty múmkindik. Sol múmkindikti birge syılaıyq, – dep atap ótti ortalyq dırektory Ermaǵambet Qýatbaev.
Donor kúni barysynda 27 myń mıllılıtr (27 lıtr) donorlyq qan jáne onyń komponentteri daıyndaldy. Bul kólem ortalyq patsıentterin ómirlik mańyzdy transfýzııalarmen qamtamasyz etip, aýyr háldegi ondaǵan adamǵa kómek kórsetýge múmkindik beredi.
Ortalyq kún saıyn ınfarkt alǵan, aýyr júrek-qan tamyr aýrýlarymen jáne operatsııadan keıingi asqynýlarmen túsken patsıentterge joǵary tehnologııalyq medıtsınalyq kómek kórsetedi. Bul donorlyq qanǵa turaqty qajettilikti jáne onyń qoryn únemi tolyqtyryp otyrýdy talap etedi. Dárigerler eske salady: bir ret qan tapsyrý birneshe adamnyń ómirin saqtap qalýy múmkin. Donorlyq qan operatsııadan keıin, ınfarkt, jaraqat jáne basqa da aýyr jaǵdaıdaǵy patsıentterge kún saıyn qajet.
Qan tapsyrar aldynda árbir qatysýshy tegin medıtsınalyq tekserýden ótip, keńes alady.
Aıta keteıik, elde 4 506 adam donorlyq aǵza kezeginde tur.
Kókshetaýda polıtseı 20 lıtr qan tapsyrdy.