Dóńgelek ústelde respýblıkanyń 4 óńirindegi psıhıatrııalyq mekemelerde júrgizilgen monıtorıngtiń nátıjeleri usynyldy
ASTANA. Sáýirdiń 1-i. QazAqparat /Gúlmıra Álıakparova/ - Búgin Astanada ótken dóńgelek ústelde Adam quqyqtary men zańdylyqty saqtaý jónindegi Qazaqstan halyqaralyq bıýrosy, Qazaqstannyń 4 óńirinde - Astana, Óskemen, Qostanaı jáne Pavlodardaǵy psıhıatrııalyq mekemelerde júrgizilgen monıtorıngtiń nátıjelerin usyndy,
dep habarlaıdy QazAqparat.
«Adam quqyqtary men zańdylyqty saqtaý jónindegi Qazaqstan halyqaralyq bıýrosy» qoǵamdyq birlestigi Astana qalalyq fılıalynyń dırektory Anar Ybraevanyń aıtýynsha, Qazaqstan Respýblıkasynyń qoldanystaǵy zańnamasy ár adamnyń quqyqtary men bostandyqtarynyń qamtamasyz etilýin qarastyratynyna qaramastan, kóptegen sebepterge baılanysty qazirgi ýaqytta júıke júıesi aýrýlaryna shaldyqqan adamdardyń bul quqyqtary aıaq asty etilip otyr.
A.Ybraevanyń sózine qaraǵanda, ózi basqaryp otyrǵan mekemede qoǵamdyq monıtorıng júrgizýge bas dárigerlerdiń barlyǵy birden kelisim bermegen. Mysalǵa, pavlodarlyq psıho-nevrologııalyq dıspanserdiń bas dárigeri mundaı zertteýlerdi júrgizýge úzildi-kesildi qarsy bolǵan.
«Tekseris barysynda 227 naýqas, olardyń 39 týysy, 3 bas dáriger, 24 bólim meńgerýshisi, 422 medıtsınalyq qyzmetker men 36 qorǵaýshy saýalnamalyq suraqtarǵa jaýap berdi. Buzýshylyqtardyń negizgi sebepteriniń arasynda - QR Konstıtýtsııasynyń jekelegen normatıvtik quqyqtyq aktileriniń Qazaqstanmen ratıfıkatsııalanǵan halyqaralyq kelisimderge sáıkes kelmeýi, qoldanystaǵy zańnamalardyń saqtalmaýy, júıeke júıesi aýyratyn naýqastardy kemsitý, psıhıatrııalyq mekemelerdiń «qaldyq qaǵıdattary» boıynsha qarjylandyrylýy, kadrlyq jáne taǵy basqa máseleler bar», - deıdi ol.
Sondaı-aq onyń aıtýynsha, barlyq aımaqtardaǵy psıhıatrııalyq mekemedegi tártipter tym qatań, máselen, terezeler temir torlarmen jabylyp, naýqastardyń týysqandarymen kórisýine jaǵdaı jasalmaǵan. Sonymen birge, bilikti kadrlar, ásirese dárigerler jetispeıdi, Qazaqstannyń normatıvtik-quqyqtyq aktileri týraly medıtsınalyq qyzmetkerlerdiń bilim deńgeıleri óte tómen bolǵan. Al keıbir mekemeler kúrdeli jóndeýdi qajet etedi.
A.Ybraeva atap kórsetkendeı, «Halyq densaýlyǵy jáne densaýlyq saqtaý júıesi týraly» ulttyq Kodekste keıbir baptar aıaǵyna deıin jetkizilmegen. Máselen, Kodekste naýqastardy kúshtep emdeý merziminiń aıaqtalý ýaqyty jazylmaǵan, sondaı-aq fılıal dırektorynyń pikirinshe, naýqasty óz erkinsiz aýrýhanaǵa jatqyzý týraly sheshim 1 ǵana dárigermen qabyldanbaýy tıis.
