Túrkııada dóner men shujyq ónimderine jańa talap engizildi
ASTANA. KAZINFORM — Túrkııada et, shujyq ónimderi men dóner daıyndaýǵa jáne qaptamada kórsetýge tıis talaptar jańartyldy. Bul týraly Kazinform agenttiginiń Ankaradaǵy menshikti tilshisi habarlaıdy.
Túrkııanyń Aýyl jáne orman sharýashylyǵy mınıstrligi et ónimderine qatysty jańa standarttardy bekitti. Tıisti ereje resmı basylymda jarııalanyp, kúshine endi.
Jańa erejege sáıkes, et ónimderiniń quramyn baıytý úshin et, sút, jumyrtqa jáne ıogýrttan ózge aqýyz ben azot kózderin paıdalanýǵa tyıym salynady. Bul talap sýdjýk, pastyrma jáne kavýrma sııaqty dástúrli et ónimderine de qatysty.
Jańa talaptar dónerge de engizildi. Endi óndirýshiler qaptamada ónimniń daıyndalý tásilin naqty kórsetýge mindetti. Dónerdiń tutas etten, et pen tartylǵan et qospasynan nemese tek tartylǵan etten jasalǵany jazylýy kerek. Bul ózgeris tutynýshyǵa satyp alatyn óniminiń quramy men daıyndalý ereksheligi týraly naqty aqparat alýǵa múmkindik beredi.
Et ónimderine qosylatyn qospalarǵa da jańa talap qoıyldy. Óndirýshiler ónimniń salmaǵyn arttyrý úshin soıa, krahmal jáne osyǵan uqsas komponentterdi shamadan tys paıdalana almaıdy. Sonymen qatar qus etinen jasalǵan daıyn qospalar men dónerdegi maı mólsheri 20 paıyzdan 15 paıyzǵa deıin qysqartyldy.
Túrkııanyń Aýyl jáne orman sharýashylyǵy mınıstri Ibrahım ıÝmakly jańa talaptar et ónimderiniń quramyn turaqty baqylaýda ustap, dástúrli ónimderdiń ereksheligin saqtaýǵa múmkindik beretinin aıtty. Onyń sózinshe, óndirýshilerdiń ónim kólemin kóbeıtý úshin soıa men krahmal qosýyna jol berilmeıdi. Osy talaptardyń oryndalýyn qamtamasyz etý úshin kásiporyndarda tekserý jalǵasa beredi.
Jańa talaptar kúshine engenge deıin jumys istep kelgen kásiporyndarǵa óndirisin jańa erejelerge beıimdeý úshin ótpeli kezeń berildi. Osy ýaqyt ishinde óndirýshiler óndiris protsesin jańartyp, ónim quramyn belgilengen talaptarǵa sáıkestendirýi qajet. Kásiporyndar bul jumysty 2027 jyldyń 31 naýryzyna deıin aıaqtaýǵa tıis.
Buǵan deıin Eýroodaq Túrkııaǵa dástúrli dónerge eksklıýzıvti quqyq berýden bas tartqanyn habarlaǵan edik.
