Donald Tramptyń ulyqtaý rásimine kimder barady
ASTANA. KAZINFORM – Jańadan saılanǵan prezıdent Donald Tramp óziniń ulyqtaý rásimine sheteldik memleket basshylaryn shaqyrǵan alǵashqy AQSh basshysy boldy. Osy oraıda onyń dástúrdi nelikten buzǵany jaıynda jáne saltanatty sharaǵa kimder keletini jóninde Kazinform-nyń menshikti tilshisi jaýap izdep kórdi.
2025 jyldyń 20 qańtarynda Donald Tramp Amerıka Qurama Shtattarynyń 47-shi prezıdenti bolady.
Ulyqtaý rásimi 1981 jyldan beri Kapıtolıı ǵımaratynda ótip keledi, ony AQSh-tyń barlyq jańalyqtar arnalarynda jáne áleýmettik jelilerde tikeleı efırde kórýge bolady. Saltanatty sharaǵa birqatar saıasatker, sonyń arasynda sheteldikter de qatysady.
Byltyr jeltoqsan aıynda Donald Tramp QHR tóraǵasy Sı Tszınpındi ulyqtaý rásimine shaqyrǵany málim boldy.
Buǵan deıin sarapshylar Qytaı basshysy Sı Tszınpın ınaýgýratsııaǵa qatyspaýy múmkin degen paıym aıtty.
CNN-niń habarlaýynsha, saltanatty sharaǵa Qytaı basshysynyń ornyna QHR-diń joǵary laýazymdy tulǵalarynan quralǵan delegatsııa keledi.
CBS News aqparatyna qaraǵanda, Argentına prezıdenti Haver Mıleı AQSh-tyń jańadan saılanǵan prezıdenti Tramptyń ulyqtaý rásimine qatysýdy josparlap otyr.
D. Tramptyń jaqyn odaqtastary Salvador prezıdenti Naııb Býkele men Italııa premer-mınıstri Djordjı Melonıge shaqyrtýlar jiberilgeni belgili. Amerıkalyq tarap Majarstan premer-mınıstri Vıktor Orbanǵa da shaqyrý joldady.
Bul rette, Reseı prezıdenti Vladımır Pýtınniń barýy qarastyrylmaǵan. Kreml AQSh kóshbasshynyń ant berý rásimine shaqyrtý almaǵanyn rastady, dep habarlaıdy Sky News.
Associated Press-tiń habarlaýynsha, Donald Tramp Ýkraına basshysynyń da shaqyrylmaǵanyn aıtty.
«Biraq ol kelgisi kelse, men onyń ulyqtaý rásiminde bolǵanyn qalaımyn», - dep jaýap bergen.
Konnektıkýt memlekettik ýnıversıtetiniń tarıhshysy Tomas Baltserskı ulyqtaý rásimine birneshe sheteldik kóshbasshynyń kelýi oqıǵasy AQSh-tyń burynnan kele jatqan dástúrinde bolmaǵan jaǵdaı ekenin atap ótti.
Buryndary shetel basshylaryna AQSh-taǵy ulyqtaý is-sharalaryna qatysýǵa tyıym salynǵan bolatyn. Mysaly, 2009 jyly jańadan saılanǵan prezıdent Barak Obamanyń ınaýgýratsııasynyń aldynda AQSh Memlekettik departamenti elshilikterge hat joldaǵan edi. Onda «Burynǵydaı bul is-shara aıasynda Vashıngtonǵa sheteldik delegatsııalar shaqyrylmaıdy» dep atalyp ótken.
Tarıhshy buǵan birqatar sebep bar ekenin túsindirip otyr. Birinshiden, sheteldik memleket basshysynyń AQSh-qa saparyn uıymdastyrý jumystary kóp ýaqytty qajet etedi. Bul turǵyda saıası máseleni de eskerý kerek. ıAǵnı, sheteldik memleket basshysynyń sapary, ádette, saltanatty qabyldaý is-sharalaryn qamtýy tıis. Onyń aıasynda birlesken baspasóz máslıhaty men memlekettik deńgeıde keshki as uıymdastyrylady.
Degenmen, AQSh jaǵynyń burynnan kele jatqan tártipti elemeýi jańa dıplomatııalyq dáýirdiń bastalǵanyn ańǵartady. Sheteldik kóshbasshylardyń qatysý máselesi áli de kúrdeli jáne naqty mán-jaıy habarlanbady, biraq qonaqtar arasynda qazirgi AQSh prezıdenti de bolatyny belgili.
Aq úı qarasha aıynyń sońynda prezıdent Djo Baıden men birinshi hanym Djıl Baıden AQSh-tyń jańa prezıdentiniń ınaýgýratsııasyna qatysatynyn rastady.
Sondaı-aq Kongress, Joǵarǵy sot músheleri, AQSh-tyń joǵary laýazymdy áskerıleri, burynǵy prezıdentter men vıtse-prezıdentter, AQSh-tyń eń joǵary áskerı nagradasyn alǵandar, sondaı-aq Tramptyń otbasy músheleri qatysady.
Bul rette sol kúni turǵyndar sherýge shyǵýy múmkin ekenin joqqa shyǵarýǵa bolmaıdy. Máselen, 2017 jyly Donald Tramptyń alǵashqy ulyqtaý rásimi kezinde AQSh-tyń túkpir-túkpirinde narazylyq aktsııalary ótip, oǵan keıbir málimetter boıynsha 4 mln-nan astam adam qatysqan.
Eske salsaq, 5 qarashada ótken saılaýda Respýblıkalyq partııa jetekshisi Donald Tramp jeńiske jetti.