Donald Trampqa jasalǵan qastandyqqa qatysty jańa derek shyqty
ASTANA. KAZINFORM— Wall Street Journal basylymy AQSh respýblıkalyq partııasynyń kandıdaty Donald Trampqa oq jaýdyrǵan 20 jastaǵy Tomas Metıý Krýks týraly jańa málimetterdi ashty, dep jazady BILD.
Krýks qural-jabdyqtar men hımııalyq zattardy ata-anasynyń úıinde saqtaǵan. Ol ǵylymǵa qyzyǵýshylyq tanytyp, eksperıment júrgizgen jáne birneshe marapaty bar matematık bolǵandyqtan, onyń ata-anasy oǵash eshteńeden kúdiktenbegen, dedi FTB-ynyń arnaıy agenti Kevın Rodjak Wall Street Journal basylymyna.
– Ata-anasy bul týraly eshteńe bilmeıtinderin aıtty. Jaýap alý kezinde ózderin senimdi ustap, tergeýge kómektesti, - dep qosty ol.
Qupııa qyzmettiń burynǵy agenti Pol Ekloff The Hill gazetine bergen suhbatynda Krýkstyń psıhıkalyq densaýlyǵynda problema bar dep boljady. Buǵan deıin New York Post gazeti Krýks bolǵan oqıǵaǵa deıin depressııalyq buzylys týraly aqparatty ınternetten izdegenin jazǵan. Sonymen qatar, ol Slovakııa premer-mınıstri Robert Fıkoǵa bıylǵy jyldyń mamyr aıynda jasalǵan qastandyq týraly oqyǵan.
Esterińizge sala keteıik, Donald Trampqa AQSh-tyń Pensılvanııa shtatynyń Batler qalasynda saılaýaldy naýqany kezinde qastandyq jasaldy. Onda 20 jastaǵy Tomas Metıý Krýks Tramp sóıleı bastaǵannan birneshe mınýt ótken soń avtomattan oq jaýdyrdy.
