Donald Tramp jeńiske jetse tarıhta bolmaǵan iri deportatsııa operatsııasyn bastaýǵa ýáde berdi
VAShINGTON. KAZINFORM - AQSh-tyń burynǵy prezıdenti Donald Tramp ekinshi merzimge agressıvti jáne órshil saıası baǵdarlama usynyp otyr. Onyń buǵan deıingi prezıdenttik naýqandaǵy ýádeleri buǵan qaraǵanda qalypty kórinetin, dep jazady NBC News.
Immıgratsııa máselesi 2024 jylǵy Aq úı úshin kúreste basty máselege aınalady, ol respýblıkashyl kandıdattyń ár saılaýaldy sózinde kóterilip keledi. Jeńiske jetken jaǵdaıda Donald Tramp Baıden ákimshiliginiń barlyq ashyq shekara saıasatyn dereý joıyp, Amerıka tarıhyndaǵy eń iri deportatsııa operatsııasyn bastaýǵa nıetti.
2016 jyly Donald Tramp birneshe ret AQSh-Meksıka shekarasynda 1000 mıldik qabyrǵa salýǵa ýáde berdi. Nátıjesinde 453 mıl shekara qorshaýy júzege asyryldy. Bul joly Tramp bastaǵan isin aıaqtaýǵa ýáde berdi.
Ekonomıka salasynda ishki óndiristi basymdyqqa aınaldyrý maqsatynda AQSh-qa shetelden keletin barlyq taýarlarǵa ámbebap 10% salyq engizý josparlanýda. Saılaý naýqany kezinde Tramp óz óndirisin shet memleketterge aýtsorsıngke beretin kompanııalardy joǵary baj salyǵymen qorqytty.
Burynǵy prezıdent qalalardaǵy qylmyspen kúresý úshin Qarýly Kúshterdi, atap aıtqanda ulttyq gvardııany el ishinde paıdalanýdy usyndy.
Sondaı-aq, Donald Tramp esirtki satýshylarǵa jasaǵan qylmystarynyń aýyrlyǵyna baılanysty ólim jazasy taǵaıyndalýyn únemi talap etip keledi.
Burynǵy prezıdent 2016 jyly saılaýǵa túsken kezde Bilim mınıstrligin taratýdy usynǵan bolatyn. Onyń bıliktegi kezinde bilim jáne eńbek bólimderin biriktirý áreketi sátsiz boldy. Ol sonymen qatar sýbsıdııalanǵan stýdenttik nesıeler men memlekettik qyzmet nesıelerin keshirý baǵdarlamasyn toqtatatyn departament bıýdjetinen mıllıardtaǵan dollardy qysqartýǵa tyrysty.
Onyń taǵy bir jıi qaıtalaıtyn máseleleriniń biri Baıden klanyn jaýapkershilikke tartý nıetine baǵyttalǵan.
Ótken aptada Ońtústik Karolınde sóılegen sózinde Tramp bul ustanymyn ózgertip, Djo Baıdennen kek alý raıynan qaıtqanyn aıtty. Tramp kópshilikten kekesinmen Djo Baıden kek alýǵa tura ma dep suraǵanda «joq» degen aıqaılar alańdy toltyrdy.
AQSh-taǵy saılaý 2024 jyldyń 5 qarashasyna belgilengen. Donald Tramp Nevada, Aıova, Nıý-Gempshır jáne Vırgın araldarynda ótken ishki partııalyq saılaýda senimdi túrde jeńiske jetti.
