Donald Tramp VVS-ge qarsy 5 mlrd dollar talap etip, sotqa júgindi

ASTANA. KAZINFORM – AQSh prezıdenti Donald Tramp brıtandyq habar taratý korporatsııasyn (BBC) jala japty dep aıyptap, 5 mıllıard dollar kóleminde ótemaqy óndirýdi talap etip, sotqa talap-aryz túsirdi, dep habarlaıdy BBC.

Tramptyń advokattary 2025 jylǵy 15 jeltoqsanda AQSh-tyń Florıda shtatyndaǵy sotqa joldanǵan talap-aryzda VVS-di kommertsııalyq quqyq normalaryn buzdy jáne 2021 jylǵy 6 qańtarda aıtylǵan sózderin «ádeıi, qasaqana jáne jańylystyratyn túrde» montajdady dep aıyptaǵan. Onda Tramp VVS-diń Panorama derekti baǵdarlamasynda Kapıtolııge shabýyl jasalǵan kúni sóılegen sózinen alynǵan úzindiler týraly aıtqan.

Talap-aryzda prezıdent brıtandyq habar taratý korporatsııasynan 5 mıllıard dollar ótemaqy tóleýdi talap etedi.

VVS basshylyǵy ázirge sotqa talap-aryzdyń berilýine qatysty resmı túsinikteme jasaǵan joq.

Buǵan deıin, qarasha aıynda VVS Donald Tramptyń sózderi montajdalǵany úshin keshirim suraǵanymen, ótemaqy tóleý talabyn qabyldamaǵan. Korporatsııa bul jaǵdaıda jala jabý týraly aıyptaýǵa negiz joq ekenin málimdegen.

Donald Tramp sotqa júginý nıetin qarasha aıynyń basynda jarııalaǵan bolatyn.

— Men osylaı isteýim kerek dep oılaımyn. Olar aldady. Men aıtqan sózderdi ózgertti, — degen Tramp jýrnalısterge.

Osydan keıin ol korporatsııaǵa sotqa beremin dep eskertken hat joldaǵan.

Sondaı-aq janjal brıtandyq Telegraph basylymy VVS redaktsııalyq standarttar komıtetiniń burynǵy táýelsiz keńesshisi Maıkl Preskottyń qyzmettik jazbasyn jarııalaǵannan keıin órshigeni atap ótiledi. Qujatta Preskott korporatsııa basshylyǵyna Panorama baǵdarlamasynda Donald Tramptyń sózi maǵynasy burmalanatyndaı etip montajdalǵanyn eskertken.

Buǵan deıin AQSh prezıdenti VVS jýrnalısterin óz sózin burmalady dep aıyptap, korporatsııany 1 mıllıard dollar talap etip sotqa beremin dep qorqytqany habarlanǵan.