Donald Tramp taǵy da birneshe BAQ-ty lıtsenzııasynan aıyrýǵa shaqyrdy

ASTANA. KAZINFORM — Donald Tramp AQSh prezıdenti men respýblıkashyldarǵa teris kózqarastaǵy aqparat agenttikterin synǵa alyp, lıtsenzııalaryn qaıtaryp alamyz dep qorqytty, dep habarlaıdy agenttiktiń menshikti tilshisi.

— Eger telearnalary men olardyń túngi shoýlary prezıdent Donald Trampqa, MAGA («Amerıkany qaıtadan uly et» qozǵalysy) jáne Respýblıkalyq partııaǵa kózqarasy 100% derlik teris bolsa, olardyń baǵaly habar taratý lıtsenzııalarynan aıyrý kerek emes pe? Men kelisemin, — dep jazdy Donald Tramp Truth Social saıtynda.

Tramp AQSh prezıdenti men respýblıkashyldarǵa beıtarap kózqaras tanytatyn úsh aqparat agenttigin synǵa aldy.

— Eń nashar túngi efır júrgizýshileri CBS, ABC nemese NBC-de me? Olardyń barlyǵyna ortaq úsh nárse bar: joǵary jalaqy, talanttyń joqtyǵy jáne óte tómen reıtıng, — dep qosty Tramp.

Ol sonymen qatar CBS News arnasynda «Late Show with Stephen Colbert» shoýyn júrgizgen burynǵy júrgizýshi Stıven Kolbertti erekshe atap ótti.

— Stıven Kolbert - shoý-bızneste tabysqa jetý úshin talanty da, basqasy da joq óte aıanyshty adam. CBS ony jumystan shyǵarǵanda ol óziniń tómen reıtınginen de nashar kúıge tústi. Stıven óshpendilikpen, ashýmen ómir súredi — júrip júrgen «máıit», — dedi Tramp.

AQSh prezıdenti Donald Tramp buǵan deıin brıtandyq habar taratý korporatsııasyn (BBC) jala japty dep aıyptap, 5 mıllıard dollar kóleminde ótemaqy óndirýdi talap etip, sotqa talap-aryz túsirdi.