Donald Tramp pen Sı Tszınpın Aq úıde kezdesti
ASTANA. KAZINFORM — QHR tóraǵasy Sı Tszınpın AQSh prezıdenti Donald Tramptyń Aq úıde Qytaı basshysynyń AQSh-qa úsh kúndik memlekettik saparyna oraı uıymdastyrǵan qarsy alý rásimine qatysty, dep habarlaıdy Kazinform agenttiginiń Beıjińdegi menshikti tilshisi.
Sı Tszınpın qarsy alý rásiminde sóılegen sózinde AQSh-qa sapary eki el arasyndaǵy dostyq pen yntymaqtastyqty nyǵaıtýǵa, sondaı-aq eki halyqtyń ál-aýqatyn arttyrýǵa baǵyttalǵanyn aıtty, dep jazady Xinhua.
Onyń aıtýynsha, Qytaıdyń ashyqtyqqa degen ustanymy ózgermeıdi. Eki eldiń múddeleri ózara tyǵyz baılanysty jáne yntymaqtastyq úshin aýqymdy múmkindikter bar.
QHR tóraǵasy AQSh halqyn el táýelsizdiginiń 250 jyldyǵymen quttyqtady. Ol aldaǵy bes jylda Qytaıdyń 100 myń amerıkalyq jasty bilim berý jáne almasý baǵdarlamalaryna qatysý úshin elge shaqyratynyn málimdedi. Sondaı-aq jaqyn arada Atlanta haıýanattar baǵynda eki alyp panda paıda bolatynyn aıtty.
Sı Tszınpın óz sózinde ózi men AQSh prezıdenti eki eldiń syrtqy saıasat, saýda-ekonomıka, qarjy, quqyq qorǵaý, gýmanıtarlyq jáne basqa da salalardaǵy vedomstvolary arasyndaǵy baılanysty nyǵaıtýdy qoldaıtynyn atap ótti.
— Qytaı men AQSh arasyndaǵy yntymaqtastyq álemdegi barlyq máseleni sheshe almaıdy, alaıda mundaı yntymaqtastyqsyz kóptegen problemany sheshý qıyn, — dedi ol.
Sı Tszınpın Donald Tramppen birge Qytaı-AQSh qarym-qatynastarynyń «úlken kemesiniń» turaqty ári uzaq merzimdi damýyna baǵyt berýge daıyn ekenin atap ótti.
Óz kezeginde AQSh prezıdenti Donald Tramp Sı Tszınpınniń sapary barysynda jasandy ıntellekttiń bolashaǵy talqylanatynyn aıtty. Amerıkalyq kóshbasshynyń sózin CNN keltirdi.
Donald Tramp AQSh pen Qytaı arasyndaǵy saýda qatynastarynda jańa ilgerileýshilik bar ekenin aıtyp, ózi men Sı Tszınpınniń eki el aldynda turǵan máselelerdi sheshýde aıtarlyqtaı jetistikterge qol jetkizgenin málimdedi.
AQSh prezıdenti sondaı-aq mamyr aıynda Beıjińge jasaǵan saparyn jáne jańa Saýda palatasynyń qurylǵanyn atap ótti. Ol jańa qurylymdy múldem jańa mehanızm ári «keremet tabysty» joba dep atady.
— Bizdiń komandalar saýda qatynastaryn teńgerimdi etý úshin jumys istep jatyr. Bul amerıkalyq fermerler men mal ósirýshilerge jańa naryqtarǵa shyǵýǵa múmkindik berýdi de qamtıdy, — dedi ol.
Saltanatty rásimnen keıin Sı Tszınpın men Donald Tramp shaǵyn quramda kezdesý ótkizdi.
Buǵan deıin Sı Tszınpınniń AQSh-qa 23-25 qyrkúıek aralyǵynda saparlaıtyny habarlanǵan bolatyn.
