Donald Tramp ótken medıtsınalyq tekserýdiń nátıjesi belgili boldy

ASTANA.KAZINFORM - Donald Tramptyń «kognıtıvti jáne fızıkalyq jaǵdaıy óte jaqsy» dep jazdy onyń Aq úıdegi dárigeri anyqtamasynda, dep habarlaıdy VVS.

Donald Tramp prezıdent retindegi ekinshi merzimi bastalǵannan beri alǵashqy medıtsınalyq tekserýden ótti. Ol Merılend shtatyndaǵy «Ýolter Rıd» áskerı aýrýhanasynda tekserýden ótip, bul protsess bes saǵatqa sozyldy.

Ótken shildede jasalǵan shabýyldan keıin Tramptyń «oń qulaǵynda oq tıgen tyrtyq» qalǵan.

— Prezıdent Tramptyń densaýlyǵy óte jaqsy, oǵan júrek, ókpe jumysy, nevrologııalyq jáne fızıkalyq kúıi dálel, — delingen onyń dárigeri kapıtan Shon Barbabellanyń jeksenbi, 13 sáýirde Aq úı taratqan málimdemesinde.

Tramp 78 jasynda qyzmetke kirisken eń qart prezıdent. Onyń aldyndaǵy prezıdent Djo Baıden qyzmetinen keter aldynda 82 jasta boldy.

Buǵan deıin amerıkalyq prezıdent josparly medıtsınalyq tekserý kezinde dementsııa synaǵynan ótkenin habarlaǵan edik.