Donald Tramp Nıý-Iorktegi alaıaqtyq isi boıynsha 175 mıllıon dollar tóledi
ASTANA. KAZINFORM - AQSh-tyń burynǵy prezıdenti Donald Tramp Nıý-Iorktegi alaıaqtyq isi boıynsha kepilge 175 mıllıon dollar tóledi. Ol bul somany tólemegen jaǵdaıda, aktıvteri tárkilenýshi edi, dep jazady VVS.
Buǵan deıin Nıý-Iork soty Tramptyń kepil aqysyn 464 mıllıon dollar dep belgilegen, biraq appelıatsııa nátıjesinde ol aıtarlyqtaı qysqardy.
Aqpan aıynda sot Trampty qarjylyq alaıaqtyq jasaǵany úshin kináli dep tapty. Sot sheshiminde eks-prezıdenttiń bankterdi jańylystyrý jáne nesıe sharttaryn jaqsartý úshin on jyl boıy baılyǵyn asyra kórsetkeni aıtylǵan.
Respýblıkalyq partııadan qaıtadan Aqúıge úmitker Tramp barlyq aıyptardy negizsiz jáne saıası sebepteri bar, dep túsindirdi.
Tramp sot sheshimine qarsy apellıatsııalyq shaǵym túsirgen, shaǵym qabyldanbaǵan jaǵdaıda eks-prezıdent 464 mıllıondy tolyǵymen tóleýi kerek. Buǵan deıin Tramptyń advokattary onyń salyq tóleý úshin mundaı somany taba almaıtynyn aıtqan bolatyn.
Eger Tramp 175 mıllıon dollarlyq kepildi tólemese, onyń barlyq múlki, sonyń ishinde Manhettendegi záýlim úıi men Florıdadaǵy Mar-a-Lago jeri tárkilený qaýpine ushyraýy múmkin edi.
Sonymen qatar, Tramp jazýshy Djın Kerrollǵa jala japqany úshin kináli dep tanylǵan taǵy bir is boıynsha 91 mıllıon dollar tóleýge májbúr boldy.
Forbes jýrnalynyń esepteýinshe, Tramptyń taza baılyǵy 5,7 mıllıard dollardy quraıdy – ol eks-prezıdent óziniń Truth Social áleýmettik jelisiniń aktsııalaryn bırjaǵa ornalastyrǵannan keıin kúrt ósti.
Alaıda Tramp buǵan deıin qolyndaǵy qolma-qol aqshanyń kólemi 400-500 mıllıon dollardy quraıtynyn aıtqan.
Nıý-Iorktegi azamattyq alaıaqtyq is Aqúıdiń burynǵy basshysyna qarsy qozǵalǵan birneshe isterdiń biri ǵana.
15 sáýirde Manhettende onyń qylmystyq isteriniń biri - 2016 jylǵy prezıdenttik saılaý qarsańyndaǵy pornojuldyz Stormı Denıelske qatysty tólemder boıynsha birinshi tyńdaý bastalady.
Sondaı-aq Trampqa Vashıngtonda búlik jasamaq boldy, Djordjııadaǵy prezıdent saılaýynyń nátıjelerin joıdy jáne prezıdent qyzmetin atqarǵan kezde qupııa qujattardy saqtaý erejesin buzdy, degen aıyptar taǵyldy.
