Donald Tramp Nevadadaǵy partııaishilik saılaýda jeńiske jetti

ASTANA. KAZINFORM - AQSh-tyń burynǵy prezıdenti Donald Tramp Nevada shtatyndaǵy ishkipartııalyq saılaýda senimdi jeńiske jetip, Respýblıkalyq partııadan úmitker bolý jolyndaǵy alǵa umtylýyn jalǵastyrdy. 

Bul onyń Aıova, Nıý-Gempshır jáne Vırgın araldarynda jeńiske jetkennen keıingi tórtinshi iri jeńisi.

Tramp jarysty 97,6% daýyspen jeńdi, shtat atynan 26 delegat aldy. Onyń jalǵyz qarsylasy Tehas bıznesmeni jáne pastor Raıan Bınklı boldy, ol Nevada respýblıkashylarynyń 2,4% daýysyn jınaǵan. 

Al bas básekelesi, AQSh-tyń BUU-daǵy burynǵy elshisi jáne Ońtústik Karolınanyń burynǵy gýbernatory Nıkkı Heılı esimi bıýlletende bolmaǵandyqtan birde-bir daýys ala almady. 

Nevadadaǵy kandıdattardy usyný protsesi birshama kúrdeli jáne ony shtat emes, saıası partııalar basqarady. Tramp odaqtastarynan turatyn Nevada Respýblıkalyq partııasy eki kandıdat arasynda ishkipartııalyq saılaý ótkizýge sheshim qabyldady, Nıkkı Heılı Nevadaǵa is júzinde ýaqyt pen resýrstar jumsamady.

Heılı kúres jalǵastyrýǵa ant berdi. Ol jáne onyń komandasy Ońtústik Karolınaǵa kóbirek ýaqyt pen kúsh jumsady, onda Heılı 6 jyl boıy shtat gýbernatory qyzmetin atqardy. Degenmen, saýalnamalar Tramptyń Ońtústik Karolınada 24 aqpanda ótetin praımerızdiń aldynda alda turǵanyn kórsetti.

AQSh-taǵy saılaý 2024 jyldyń 5 qarashasyna belgilengen.