Donald Tramp mıtıngte oq ótpeıtin áınek artynda turyp sóıledi

ASTANA. KAZINFORM — AQSh prezıdenttigine úmitker Donald Tramp ózine qastandyq jasalǵannan keıin alǵash ret ashyq mıtıng ótkizdi. Saıasatkerdiń oq ótpeıtin áınek artynda turyp sóılegenin C-SPAN jarııalaǵan kadrlardan kórýge bolady.

Mıtıng Soltústik Karolına shtatynyń Eshboro qalasynda ótti. Respýblıkalyq kandıdatty tórt áınekten turatyn oq ótpeıtin panelder qorǵap turdy: bireýi aldyńǵy jaǵynda jáne úsheýi artqy jaǵynda. Buǵan deıin amerıkalyq BAQ eks-prezıdenttiń basynda bolǵan oqıǵadan keıin AQSh qupııa qyzmeti qaýipsizdik sharalaryn qabyldaıtynyn habarlaǵan bolatyn.

Mıtıng bastalǵannan keıin kóp uzamaı, jedel járdem kómegine shaqyrǵan daýys estilip, Tramp sózin toqtatty. Saıasatker qorshaýdan shyǵyp, Qupııa qyzmet qyzmetkerleriniń qorshaýynda jaǵdaıy qalypqa kelgen áıelge taqap, ony qushaqtady. Osydan keıin ol sahnaǵa qaıta oralyp, sózin jalǵastyrdy.

13 shildede Batlerde (Pensılvanııa) ótken ashyq aspan astyndaǵy mıtıngisinde Trampqa qarsy oq atylyp, ol qulaǵynan jaraqat aldy. Mıtıngtiń qaýipsizdik aımaǵynyń perımetrinen tys ǵımarattyń tóbesinen AR-15 tıpti vıntovkadan 20 jastaǵy Tomas Mettıý Brýks oq jaýdyrǵan. Mergen shamamen 120 metr qashyqtyqtan birneshe ret oq atyp úlgerdi, sodan keıin ony qupııa qyzmettiń qarsy snaıper komandasynyń múshesi óltirdi.