Donald Tramp Kolýmbııaǵa qarjylaı kómektiń toqtaǵanyn habarlady

ASTANA. KAZINFORM — AQSh prezıdenti Donald Tramp Truth Social arnasynda Kolýmbııaǵa bólinetin barlyq tólemder men sýbsıdııalardy toqtatatynyn málimdedi. 

Tramp Kolýmbııa basshysy Gýstavo Petrony esirtki saýdasyna qoldaý bildirdi dep aıyptady.

— Qazir bul Kolýmbııadaǵy eń úlken bızneske aınaldy. Petro AQSh-tyń aýqymdy tólemderi men sýbsıdııalaryna qaramastan, ony toqtatý úshin eshqandaı áreket jasap jatqan joq. Bul AQSh-ty uzaq ýaqyt tonaýdan basqa eshteńe emes. Búginnen bastap Kolýmbııa osy jáne basqa qarajat nemese sýbsıdııalardy almaıdy, — dep jazdy Donald Tramp.

AQSh prezıdentiniń aıtýynsha, tyıym salynǵan zattar Kolýmbııada óndirilip, odan ári AQSh-ta satýǵa shyǵarylady. Bul adam ólimine ákep soǵyp, haos týyndatady. 

Tramp eger Kolýmbııa bıligi bul plantatsııalardy joımasa, AQSh «muny ózimiz jasaımyz» dep qorqytty.

Eske sala keteıik, Donald Tramp buǵan deıin Aq úı «lańkestik top» dep sanaıtyn esirtki kartelderimen soǵysyp jatqanyn málimdedi.