Donald Tramp Qytaı taýarlaryna baj salyǵyn 20 paıyzǵa deıin kóterdi

ASTANA. KAZINFORM — Aq úı Qytaı joǵary tarıfterge tap bolatynyn jarııalap, bul sheshimniń basty sebebi retinde AQSh-ta jalǵasyp jatqan fentanıl daǵdarysyn alǵa tartty, dep habarlaıdy Fox News. 

Qytaıǵa bastapqyda nebári 10% kóleminde belgilengen tarıfter seısenbide kúshine enedi. Dúısenbide AQSh prezıdenti Donald Tramp óz jarlyǵynda Qytaı úkimeti «Qytaı Halyq Respýblıkasynan Qurama Shtattarǵa ádetten tys jáne erekshe qaýip tóndiretin sıntetıkalyq opıoıdterdiń, sonyń ishinde fentanıldiń turaqty aǵynyn tejeý úshin sharalar qabyldamaǵanyn» málimdedi. 

Tramp sonymen qatar daǵdarys «Qurama Shtattardyń ulttyq qaýipsizdigine, syrtqy saıasaty men ekonomıkasyna» qater tóndiretinin aıtty. 

— QHR esirtkiniń zańsyz aınalymy daǵdarysyn jeńildetý úshin tıisti sharalardy qabyldamaý faktisi moıyndaı otyryp, Prezıdenttiń 14195-shi Jarlyǵynyń 2(a) bólimine «10 paıyz» degen sózderdi alyp tastap, onyń ornyna «20 paıyz» degen sózdermen tolyqtyrylsyn, — delingen qujatta.

Tramp ákimshiligi qazirdiń ózinde kanadalyq jáne meksıkalyq taýarlarǵa 25% baj salyǵyn engizip jatyr, ol da seısenbide kúshine enedi.

Qytaı úkimeti tarıf týraly jarııalanǵannan beri olarǵa qarsylyq bildirdi. Qytaı Syrtqy ister mınıstrliginiń 1 aqpanda jasaǵan málimdemesinde Qytaı «saıasat jaǵynan da, iske asyrý jaǵynan da esirtkige qarsy kúreste álemdegi eń qatal elderdiń biri» ekenin málimdedi.

Eske sala keteıik, buǵan deıin Tramp Ýkraınaǵa barlyq áskerı kómekti toqtatýǵa buıryq bergenin jazǵan edik.